Словенечката компанија „Геапродукт“ неделава ги повлече од продажба црвените пиперки со потекло од Албанија поради превисока концентрација на пестицидите ацетамиприд, формат и флоникамид.

Според словенечките медиуми, пиперките првично биле спакувани во картонски кутиии, а потоа во пластични кеси.

„Поради вишокот пестициди, производот не треба да се консумира. Лицата кои биле во контакт со контаминираната храна треба да ги измијат рацете“, соопштила компанијата.

Исто така ги замолила клиентите да го вратат производот на местото од каде што го купиле, но, доколку тоа не е можно, треба да го фрлат во биолошки отпад.

Деновиве Хрватска уништи четири тони домати произведени во Албанија, откако било утврдено дека биле испрскани со хлорфенапир, и тоа со петпати поголема количина од дозволената со овој отров кој ги убива инсектите.

Претходно, пак, Хрватска и Босна и Херцеговина уништија десеттина тони праски увезени од Албанија, бидејќи во ова овошје е пронајдено високо присуство на тешкиот метал никел, кој може да предизвика канцерогени заболувања и да го загрози здравјето на луѓето.