Шумската терапија, практика што вклучува долги прошетки во природа и за која се верува дека помага во намалување на стресот, намалување на крвниот притисок и зајакнување на имунитетот, се воведува во словенечкиот образовен систем во градот Накло, објави словенечката новинска агенција СТА.

Биотехничкиот центар Накло ја предводи иницијативата за интегрирање на шумската терапија во наставната програма, како и организирање на работилници.

Здравствените придобивки од оваа практика делумно се припишуваат на фитонцидите, природни антимикробни соединенија што ги ослободуваат дрвјата, за кои научните истражувања покажаа дека можат да го намалат воспалението во телото.

Студиите од Јапонија и Јужна Кореја укажуваат на други позитивни ефекти, како што се намалување на анксиозноста, подобрување на меморијата и концентрацијата, како и подобар сон.

Програмата во Накло, наменета за студенти и вработени, ја води Мојца Логар, член на првата генерација сертифицирани водичи за шумска терапија во Словенија.

– Шумската терапија вклучува водени прошетки низ шумата од два до три часа, за време на кои систематски ги отвораме сите пет сетила. Преку вежби за дишење и свест, се обидуваме да им помогнеме на учесниците да постигнат состојба на релаксација и да ги примат позитивните ефекти од природата – рекол Логар.

Иако здравствените придобивки се потврдени, сè уште не е познато кога шумската терапија ќе биде дел од официјалниот здравствен систем во Словенија.

Логар наведува дека оваа практика е глобален тренд и едноставно, ефикасно решение за современиот човек во потрага по рамнотежа на телото, умот и духот.