Почитувани читатели на весникот и на порталот „Слободен печат“, редови гледачи и слушатели на емисијата „Утрински печат“ и на социјалните мрежи, редакцијата на „Слободен печат“ Ви ја честита Новата 2023 година и ви посакува добро здравје, радости и успеси во наредните 365 дена.

Почитувани, зад нас е година на неверојатно тешки премрежја, војна во границите на Европа, светска економска и енергетска криза која не ја заобиколи ниту нашата земја со сите свои последици врз егзистенцијата на граѓаните на Република Северна Македонија.

Поминавме година во која цените на основните животни продукти галопирачки растеа, а растеше и цената на струјата, гасот и горивата.

Минималната плата се искачи на 18.000 денари во услови кога цената на еден литар масло за јадење стигна до 160 денари, а на литар гориво над 100 денари.

Владата направи напори да го заузда неконтролираниот раст на цените на сметка на граѓаните, малите и средни претпријатија кои останаа на работ на егзистенција.

Останува обврската и предизвикот државата во наредниот период да се справи со корупцијата, реформите во правосудството и да ги разреши скандалите врзани со образованието, здравството, судството и обвинителството.

Маргинзализираните групи и годинава останаа на маргините како предизвик нивните проблеми со правата или лековит и другите проблеми да се решаваат во нивна корист во идната 2023 година.

Европскиот пат се отвори, но истовремено интерно се подигнаа бариерите за евроинтеграцијата чија разрешница останува да ја очекуваме во 2023 година доколку се создаде мнозинство кое ќе има намера да го смени Уставот и да го внесе бугарското малцинство, како услов за продолжување на интеграцијата во ЕУ, зошто во спротивно неминовно е одењето на предвремени парламентарни избори кои владејачкото мнозинство го посакува дури во наредната 2024 година.

Почитувани, Ви благодараме на довербата која ни ја дадовте како на одговорен, непристрасен и објективен медиум кој информира и анализира преку својата етаблирана новинарска и репортерска екипа за сите случувања во државата и пошироко, преку три платформи: печатено издание, електронско и видео емисијата „Утрински печат“ на Слободна ТВ,

Идната 2023 година, ние ќе продолжиме според новинарските стандарди и етика да ве информираме навремено, објективно и од сите агли за најважните проблеми во државата и настаните кои се случуваат во земјата, регионот и во светот.

Следете нѐ  и во новата 2023 година, во печатеното издание, на порталот како и на YouTube каналот на „Слободен печат“ зошто вашиот омилен медиум останува на страната на народот!

Среќна Нова 2023 година ви посакува редакцијата на „Слободен печат“