Македонската ликовна уметница Јана Манева-Чупоска на 27 ноември со цртежи од циклусот „Љубовници во пандемија“ ќе се претстави со изложба во Македонскиот културен центар во Истанбул, Турција.

Насловот на изложбата има алегорична конотација и алудира на надежта и потребата на човекот кон подобро утре. Преку фигуративните композициски ликовни претстави и колажни експерименти авторката Јана Манева-Чупоска ја пренесува нејзината психолошка и емотивна состојба во време на корона-кризата, но и покрај официјалното завршување на пандемијата, истата кај човекот остави длабоки психолошки траги на страв и несигурност.

Изложбата се состои од триесетина дела, цртежи и колажи изработени во комбинирана техника молив, јаглен, акрил и темпера и еден диптих во поголем формат изработен во техника акрил.

Изложбата е финансирана од Министерството за култура и туризам на РС Македонија како изложба од национален интерес за 2024 година, известија од ДЛУМ.