Славната манекенка и актерка Џејм Кинг го прекина молкот откако го загуби старателството над синовите со поранешниот сопруг, режисерот Кајл Њуман. Имено, таа доби само право за надгледувани посети на нејзините синови – Џејмс (11) и Лео (9).

Ѕвездата на серијата „Срцето на Дикси“, исто така, мораше да го напушти својот дом во Лос Анџелес, откако акумулираше долг за кирија од 42.580 долари, што доведе до тоа да нејзиниот сопственик ја тужи и да ја избрка, пишува „Ју-ес викли“.

„Ситуацијата со сопственикот беше решена приватно. Разочарувачки е, но не и изненадувачки, да се види како некој ја користи оваа ситуација за да привлече внимание. Во моментов, јас сум фокусирана на она што е најважно за мене – моите деца“, изјавила Кинг.

Покрај надгледуваните посети, судот ѝ наредил и шестмесечен третман од зависност од дрога и алкохол. Според судските документи до кои дојде „Ју-ес викли“, Кинг живеела во Холивуд Хилс во стан во кој плаќала 10.145 долари месечно од април 2023 година, но престанала да плаќа кирија во јануари. Сопственикот тврди дека морал да ја избрка од станот бидејќи таа намерно одбила да го напушти, но адвокатот на Кинг ги негира овие наводи, наведувајќи дека актерката работела на актерски проекти за да го исплати долгот.

Претходно оваа недела, судот пресуди дека Џејм Кинг и Кајл Њуман ќе имаат заедничко законско старателство, но единственото физичко старателство над децата му припаѓа на Њуман. Актерката има право на посети трипати неделно, но само под надзор. Договорот за старателство драстично се промени откако Кинг не успеа да ја заврши пропишаната шестмесечна програма за рехабилитација, која вклучуваше неделно тестирање за дрога и алкохол, 26 недели програма за родителство и индивидуално и заедничко советување со децата.

Инаку, во октомври 2024 година, Њуман побарал единствено старателство над децата, тврдејќи дека ја нашол својата поранешна сопруга „во тешка состојба под дејство на дрога и алкохол“ додека таа ги чувала децата. Поранешните сопружници беа во долготрајна правна битка околу финансиите и старателството, откако Кинг поднесе барање за развод во 2020 година, по 13 години брак. Тие официјално се разведоа во 2023 година.