Најновото издание на ИК „Славика либрис“ од Скопје е книгата – книжевна репортажа „Сите војни на Лара“ од полскиот автор Војќех Јагелски, а во превод на Лидија Танушевска.

Во долината на јужната страна од Кавказот жителите на грузиските села живеат спокоен живот, заедно се молат на различни богови, седат на иста маса и наздравуваат со вино, сè додека од чеченската страна не почнат да доаѓаат бегалци и вооружени бунтовници од земјата зафатена со војна. Лара е мајка на две машки деца и прави сè што е во нејзина моќ за нивното добро и нивната посветла иднина. Ги спасува од виорот на војната, која е секогаш на чекор од нив. Но, дали е тоа доволно за нивната среќа?

Војќех Јагелски (1960) е политиколог специјализиран за Африка и автор на многу ценети репортажни книги, како и еден од најценетите полски странски известувачи кој започнал во 80-тите години на 20 век како дописник на полската прес-служба.

Долги години соработувал со весникот „Газета Виборча (Gazeta Wyborcza)“, моментално пишува за „Тегодник Повшехне (Tygodnik Powszechny)“, но и за Би-би-си или „Ле Монд“. Како новинар, тој патувал во Советскиот Сојуз, Грузија, Ерменија и Азербејџан и во разни африкански држави. Заедно со извонредниот фотограф Кшиштоф Милер, тие формирале новинарски тандем, патувајќи долги години во областите на вооружени конфликти.

Добитник е на многу награди, на награди на ПЕН-клубот и од Здружението на полски новинари и награда за студентско новинарство. Автор е на репортажните книги „Молитва за дожд“, „Камени кули“, „Ноќни шетачи“, „Горење на тревата“ и „Сите војни на Лара“.

(Текстот е објавен во „Културен печат“ број 153, во печатеното издание на весникот „Слободен печат“ на 5-6 ноември 2022)