Лидерот на бугарското политичко движење „Има таков народ“, Слави Трифонов, вели дека новото Народно собрание треба веднаш да го врати ветото за преговорите на Северна Македонија со ЕУ.

Трифонов и неговата партија се противеа на укинувањето на ветото во претходниот парламентарен состав, но не успеаја да го преминат изборниот праг и нема да имаат пратеници во Народното собрание.

Причина за неговото барање се измените во Законот за здруженија и фондации, кои вчера ги усвои македонското Собрание со поддршка на власта и на опозицијата.

Според измените, кои пратениците ги изгласаа со 84 гласа „за“ и ниту еден „против“, за име, скратено име и/или назив на организација не смее да се употребуваат „имиња, презимиња, прекари, псевдоними, кратенки и иницијали на лица кои по било кој основ, начин или форма во минатото се поврзани со расна, верска, национална, етничка и друга нетрпеливост, нетолеранција, омраза, геноцид, екстреминација, ширење или поддршка на фашизам, нацизам, национал-социјализам и Третиот рајх“.

„Собранието во Северна Македонија едногласно изгласа нов закон за фондации и здруженија. Со овој закон е исполнета целта, а тоа е да се забранат сите бугарски здруженија именувани по херои од нашата историја. Кои, патем, се и херои на нивната нешто подалечна историја. Оти ​​што е Иван Михаилов за Македонија, освен херој?,

напиша Трифонов вечерва на Фејсбук.

„Прогонот против сѐ што е бугарско во Северна Македонија продолжува со полна сила. И по падот на бугарското вето, тоа доби уште поголеми и грди размери. Што не е изненадување. Доколку Европската Унија се уште се држи до човечките вредности што ги прокламира, веднаш треба да ја замрзне кандидатурата на Северна Македонија за членство во Унијата. Северна Македонија уште еднаш покажа дека не е земја достојна за унија каде што човековите права и правото на самоопределување се основни. На Бугарија и е јасно што мора да направи – прво МНР да го повика на објаснување вонредниот и ополномоштен амбасадор на Северна Македонија во нашата земја. Второ, и најважно – откако ќе почне со работа, новото Народно собрание е должно да го врати ветото на Бугарија против Северна Македонија. Бугарија е таму каде што има само еден Бугарин. Но, прашањето е – дали во нашиот нов парламент има Бугари кои го разбираат ова и на кои им е грижа? Ќе видиме“, пишува Трифонов во објавата.

.