40-годишен жител на Скопје вчера со неговиот автомобил „Алфа Ромео“ бил фатен како вози со 3.06 промили алкохол во крвта, откако го пријавиле минувачи, соопшти МВР. За одлуката да седне во автомобил многу пијан, скопјанецот кривично ќе одговара.

„СВР Скопје – Полициска станица Карпош поднесе кривична пријава против А.П.(40) од Скопје поради постоење основи на сомнение за сторено кривично дело „безобѕирно управување со моторно возило“ по член 297-а од Кривичниот законик. Имено, на 27.09.2025 во 19:00 часот на ул.„Козле“ во Скопје, постапувајќи по претходна пријава од двајца граѓани, полициски службеници од СВР Скопје го лишија од слобода А.П. затоа што бил затекнат како управува патничко возило „алфа ромео“ со скопски регистарски ознаки под дејство на алкохол, односно по преземени мерки измерени му се 3,06 промили алкохол во крвта“, пишува во полициското соопштение.

Пијаниот возач е исклучен од сообраќај и по целосно документирање на случајот против него е поднесена пријавата, додаваат од МВР.