Нова снимка на која се гледа како возрасен маж брутално шутира куче пред локал повторно ги тресе социјалните медиуми. Случката е снимена пред локал, а се претпоставува дека лицето на видеото е Бране Јовановски, независен советник во општина Македонски Брод, кој е идентификуван од страна на сограѓани. 

„Слободен печат“ се обидува да стапи во контакт со лицето Бране Јовановски, но засега неговиот службен телефон е исклучен. Притоа, стапивме во контакт и со општината, од каде информираат дека градоначалникот е на службен пат и изутрина се враќа на работното место. Оттаму велат дека слушнале за видеото, но не би можеле да потврдат дали се работи за советникот Јовановски, бидејќи, како што велат, засега е само „чаршиски муабет“. Советникот во изјава за А1.он демантира дека го малтретирал кучето, а на прашањето зошто го направил тоа, одговорил „Море што ме малтретираш човек, што е проблемот? Абе пијан човек, куче на улица ко куче на улица, што има да се расправам со тебе јас? Ај остај ме да спијам, не сум арен, остај ме ајде“.

До некои од објавувачите на видеото пристигнале пораки истото да го тргнат од социјалните мрежи. Тие во изјава за „Слободен печат“ велат дека пораките немаат заканувачки тон, а најверојатно се испратени за роднина на советникот бидејќи го делат истото презиме, истакнувајќи „Не правете драма, се работи за чергичето пред локалот, а не за кучето“.

Според Кривичниот законик, на сторителот му се заканува парична или затворска казна:

Мачење животни, Член 233: „Тој што грубо злоупотребува животно или го изложува на непотребни
маки или му нанесува непотребни болки или заради изживување го изложува
на страдање, ќе се казни со парична казна или со затвор до една година.“

Пред само два дена на социјалните медиуми вирално се споделуваше видео од момче како насилно шутира мирно куче во Куманово, а неговиот чин ја вознемири и разлути јавноста.