Вал Килмер, ѕвездата на филмовите како „Бетмен“ и „Топ ган“, почина на 65-годишна возраст од воспаление на белите дробови, откако претходно му беше дијагностициран рак на грло.

Легендарниот актер даде впечатливо стилизирана интерпретација на Морисон, симбол на психоделична сензуалност, во филмот на Оливер Стоун „Д Дорс“ (1991), а исто така имаше кратка улога како Ментор – визијата на Елвис за антихеројот на филмот кој го игра Кристијан Слејтер – во „Вистинска романса“ (1993 година), напишан од Квентин Тарантино, а режиран од Тони Скот.

Килмер беше главниот актер во филмот „Громово срце“ (1992), каде играше неискусен агент на ФБИ кој истражуваше убиство на индиски резерват во Јужна Дакота, а беше и ѕвезда на трилерот „Светецот“ (1997), во кој портретираше шармантен и снаодлив крадец.

Тој е можеби најпознат по тоа што глумеше Брус Вејн – Бетмен во филмот „Бетмен засекогаш“ (1995), меѓу Мајкл Китон и Џорџ Клуни, борејќи се во Готам против Две лица (Томи Ли Џонс) и Ридлер (Џим Кери), иако ниту Килмер ниту филмот не се сметаа за врвни претставници на франшизата за Бетмен.

Но, дотогаш веќе се разви друга, можеби поинтересна насока во кариерата на Килмер. Во 1986 година, Тони Скот го ангажираше за неговиот прв високобуџетен филм „Топ ган“ (1986), драма што предизвикува адреналин за поморските пилоти на обука, каде што Килмер го играше студениот, арогантен ривал на главната ѕвезда на филмот, Том Круз. Оваа улога постави преседан за неколку негови подоцнежни улоги, каде што тој беше или партнер на главната ѕвезда или член на ѕвездената екипа. Тој ја повтори оваа улога во кратка сцена во продолжението од 2022 година, „Топ ган: Маверик“.

Килмер го играше урбаниот пиштолџија Док Холидеј во вестернот „Томбстоун“ (1993), заедно со Курт Расел, Сем Елиот и Бил Пакстон како браќата Ерп. Тој беше дел од групата разбојници во „Жештина“ (1995), современа урбана верзија на класичната приказна за дуелот меѓу законот и криминалот, во која главните улоги ги толкуваа Роберт де Ниро како водач на разбојниците и Ал Пачино како полицаец што го гони.

Тој, исто така, глумеше заедно со Мајкл Даглас во „Духот и темнината“ (1996), историска драма за ловот на лавови во Африка до крајот на 19 век. Во филмот „Полок“ (2000), со Ед Харис како сликарот Џексон Полок, Килмер го играше неговиот колега уметник Вилем де Кунинг. Тој го играше и кралот Филип Втори, таткото на Александар Велики (Колин Фарел), во грандиозниот епски филм „Александар“ на Оливер Стоун (2004).

Во текот на својата кариера, Килмер често оставаше впечаток на непредвидливост, како кај публиката, така и кај самите филмаџии. На екранот, Килмер беше и харизматичен и интригантен, актер кој не ги издаваше лесно емоциите на своите ликови.

Надвор од екранот имал многу несогласувања, особено на почетокот на кариерата, кога се стекнал со репутација на тежок и себичен соработник. Во 1996 година, „Ентртејмент викли“објави приказна за него под наслов „Човекот кој Холивуд сака да го мрази“.

Во 2021 година е снимен документарниот филм „Вал“, базиран на децениски архивски материјал за неговиот живот.

Во едно интервју во 2012 година, Килмер зборуваше за неговата оддалеченост од Холивуд и призна дека неговата кариера добила необичен пресврт.

„Не жалам за ништо. Штом си ѕвезда, секогаш си ѕвезда – прашање е само на кое ниво“, рекол во една прилика легендарниот Вал Килмер.

На 65 години: Почина холивудската легенда Вал Килмер