Освен јајцата и свежото месо, речиси и да нема производи кои што не се поскапени, откако на 1 март трговците добија одврзани раце преку цените да го надокнадат она што го изгубија со четиримесечното замрзнување. Граѓаните велат дека изминатите десеттина дена, цените галопираат во нагорна линија, а поскапувања од 20, па и повеќе проценти се бележат кај млечните производи, саламите и смрзнатите производи. И додека политичарите не замајуваат со изборните активности, трговците лепат нови цени, па така најпродаваното мешано сирење сега варира од 459 до 553 денари за килограм (неговата замрзната цена беше 381 денари), киселите кравји млека чинат од 29 до 33 денари (беа замрзнати на 23 денари), овчите сирења стигнаа до 600 денари за килограм, а кашкавалите кравји или овчи чинат и до 800 денари. Особено се поскапени саламите, бидејќи тие во најголем дел се увозни, па обичната шункарица почнува од 370 денари за килограм, додека пушените меса(сланини, свински врат, печеница, чајната и кулените почнуваат од 550 до 750 денари. И тестенините се вивнаа и до 80 денари во зависност од брендот, маслинките се продаваат до 500 денари, а кеса замрзнат зеленчук почнува од 60 за да стигне и над 100 денари. Граѓаните посочуваат дека многу е поскапен и увозниот помфрит па така пакување од 2,5 килограми, кое доскора се продаваше за 250 до 300 денари, сега чини 550 денари. Од лани досега има големи промени и на цените на сладоледите. Потрошувачите се жалат дека секојдневно се менуваат и цените на зеленчукот и овошјето, па во ек на постот бананите се продаваат по 89 денари, јаболките од 65 до 75 денари, јагодите варираат од 130 до 220 денари, крушите се 120 денари килограм. Пред првомајските и великденските празници високи останаа и цените на доматите од 130 до 160 денари, зелениот пипер се продава за 100 денари, а една салата чини 30 денари.

Дел од помалите трговци се жалат дека добавувачите им се додворуваат на големите трговски синџири, кои го користат моментот со ставање на големи маржи. Тие прашуваат како е можно иста салама од мисиркино месо некаде да чини 610 денари за килограм, а некаде да се продава за двојно повисока цена, а се набавува од исто место?

-На големите маркети им даваат поевтина набавна цена и рок за плаќање од 60 дена, а нам ни бараат веднаш да платиме. Ние одиме со маржа од едвај 20 отсто, а големите синџири одат и над 100 отсто, со оправдување дека имаат огромни трошоци за плати, за струја, за рекламен материјал – велат во еден семеен дуќан во центарот на Скопје. Тие се убедени дека нема ништо да смени со Законот за нефер практики и посочуваат дека граѓаните не треба да се надеваат на драстично поевтинување, откако се ќе поскапи.

Што се однесува до прашањето до кога ќе го трпиме ценовниот галоп, сите факти упатуваат дека во блиска иднина, односно сè додека не се донесе Правилникот од Законот за нефер трговски практики, трговците ќе го користат моментот и ќе си прават калкулации. Списокот на над 2.500 производи, што ќе имаат ограничена маржа до 10 отсто е испратен на преглед кај коморите и ОПМ, а неговиот финален изглед ќе биде познат, најверојатно по изборите. Надлежните очекуваат Законот за нефер практики да стави крај на нелојалната конкуренција во трговијата.

Голем број прехранбени производи со ознаката „гарантирана цена“ од 20 септември лани се продаваа во маркетите по цена за 10 проценти пониска од износот на 1 август 2023 година, во согласност со одлуката на Министерството за економија, чија важност заврши на 1 март. Според, пресметката на ССМ, најмногу пари во март или нешто над 22 илјади денари, едно четиричлено семејство потрошило на храна и пијалаци. Инфлацијата на македонските работници што работат за минималец им „проголта“ неколку килограми месо, млечни производи и им ги „опустоши“ ладилниците.