Вестон Копола Кејџ, син на актерите Николас Кејџ и Кристина Фултон, доби шанса да учествува во двегодишна програма за психијатриско лекување која ќе реши две кривични дела за напад, кои го обвинуваат дека ја напднал мајка си и пријател пред нивниот стан минатата година.

„Ништо не можеше да ме подготви за 28 април 2024 година, ноќта кога син ми за малку ќе ми го одземеше животот“, рече мајката на Вестон Кејџ, Кристина Фултон, на сослушувањето во средата, пренесува „Ролингстоун“ (Rollingstone).

„Господин Кејџ страда од ментално растројство кое се квалификува за оваа програма. Задоволен сум што тоа нарушување беше значаен фактор во извршувањето на делото за кое е обвинет“, рече окружниот судија во Лос Анџелес, Енрике Монгуја на утринското сослушување. „Очигледно тој имал нервен слом во тој момент“.

Адвокатот на Вестон побара пренасочување за лекување, наведувајќи дека неговиот клиент бил подложен на интензивно болничко и амбулантско лекување по инцидентот на 28 април 2024 година. Тој рече дека Вестон го сменил лекарот и штотуку започнал нов третман по моментот на нападот. Тој исто така додаде дека Вестон оттогаш бил целосно трезен.

“Тој не се чувствувал толку добро со години. Тој е психички стабилен, наскоро ќе се ожени, се иселил од својот стар стан и навистина напредува”, рекол адвокатот Мајкл А. Голдстајн. Судијата додаде дека ако Вестон го следи планот за лекување и упатствата на лекарот во следните две години и не предизвика проблеми, случајот може да биде отфрлен во април 2027 година.

Кристина Фултон, мајката на Вестон, присуствуваше на сослушувањето и рече дека го поддржува лекувањето како алтернатива на затворот, но побара од судијата да нареди уште неколку месеци стационарно лекување, предлагајќи две клиники – во Тенеси и Конектикат. Таа потоа го опиша нападот во ужасно сведочење, велејќи дека за малку ќе го загубела животот.

„Ништо не ме подготви за 28 април 2024 година, ноќта кога син ми за малку ќе ми го одземеше животот“, рече Фултон. Таа рече дека била на вечера кога добила повик дека Вестон „го пали неговиот стан“. Таа отишла во зградата каде, како што тврди, ја пречекал во бесна и манична состојба. Рекла дека бил „бесен“, не ја сакал ни плескавицата што му ја донела и „пукнал“ кога се приближил автомобилот и ја треснал капијата. Наводно ја фатил за коса, ја фрлил на подот од лифтот и легнал врз неа, „гмечејќи ја“ и „гушејќи ја“ со тежината на телото.

“Ми го наби палецот во окото. Болката беше неподнослива. Мојот вид целосно исчезна”, рекла таа. „Ја губев свеста“. Фултон тогаш рекол дека кога се отвориле вратите на лифтот, Вестон го нападнал и својот најдобар пријател – втората жртва во случајот. Потоа, наводно, се вратил кај неа, ја удрил во ѕид, ја згазнал на вратот и ја давел додека неговиот пријател се обидувал да го повлече.

„Да не беше тој пријател кој го ризикуваше својот живот за да ме спаси, моето семејство ќе ме закопаше, а Вестон ќе беше во затвор“, изјави таа пред судот. Иако постојано му изразувала љубов на синот, додала дека сѐ уште се плаши бидејќи тој не покажал „никакво каење и одговорност“ кон неа. Вестон продолжи да гледа право напред, не одговарајќи на нејзините зборови.

„Бев демонизирана затоа што сум добра мајка“, изјави Фултон. „Денес стојам овде и барам само една работа: да ја добие помошта што ја заслужува. Ве молам помогнете му на мојот син“.