Претседателката Гордана Сиљановска Давкова присуствуваше на 30-годишнината од воспоставувањето на дипломатските односи со САД, заедно со претставници на американските владини институции, македонски дипломати во САД, како и претставници на македонската заедница.

Таа им се обрати на нашинците и им порача дека ќе направи се „за да бидеме заедно и кога сме одвоени“. Им рече да останат сплотени, да не ги пренесуваат делбите, но и да не создаваат делби надвор.

Претседателката рече дека прекрасно се чувствува секогаш кога ќе дојде овде во земја во која „за да успеете навистина треба да имате знаење и интегритет“.

„Знам дека вие сте најдоброто, за жал, најдоброто заминува. Знам дека ова е вашата втора татковина. Ви се извинувам за неправдите кон вас, знам дека има шанса заедно да ја смениме и татковината ама и човештвото, бидејќи светот не оди во добар правец“, порача Сиљановска–Давкова.

Таа рече дека посакува и во следните 30 години да продолжи стратешкото партнерство со САД, бидејќи, како што истакна „живееме во време невреме и сиот дух треба да го прибереме оти тоа е она што ќе го движи човештвото напред“.

„Кога слушам понекогаш „America the great“, си велам па не е лошо во овие чудни времиња да имате за пријател некој којшто е „the great“, оти тогаш и вие не сте мали“, истакна Сиљановска–Давкова.

На настанот присуствуваа и министрите за надворешни работи и за евроинтеграции, Тимчо Муцунски и Орхан Муртезани, кои ја придружуваат претседателката на работната посета во САД, како и претставници на дипломатскиот кор и истакнати гости од јавниот и општествениот живот.