Во претстојната документарна серија на Нетфликс, „Арнолд“, актерот и поранешен гувернер на Калифорнија, Арнолд Шварценегер се извини за сексуалното вознемирување на неколку жени во минатото, пишува „Ролинг Стоун“.

Имено, пет дена пред изборите за гувернер во Калифорнија во 2003 година, „Лос Анџелес Тајмс“ објави извештај во кој шест жени го обвинија Шварценегер дека ги допирал без нивна дозвола и вербално ги понижувал. Шварценегер, тогаш тврдеше дека извештаите се измислени и дека никогаш не се обидел сексулно да вознемири некоја жена, иако призна дека во минатото, понекогаш „се однесувал лошо“.

Години подоцна, тој во новата серија дава краток коментар и се извинува за неговите лоши постапки од минатото.

„Мојата реакција на почетокот беше одбранбена. Денес можам реално да гледам. Иако се работи за пред 40 години, тоа е што го направив е прогешно. Немам изговори, погрешив.“, кажал во документарната серија на Нетфликс.

Меѓутоа, покрај обвинувањата, Шварценегер сепак победи на тие избори. Истрагата што ја спроведе „Лос Анџелес Тајмс“ на крајот не влијаеше на анкетите, па дури ни на неговата кариера.

„Лично, бев изненадена што немаше поголем ефект врз изборите. Мислев дека повеќе луѓе ќе бидат навредени. Кога Шварценегер објави дека се кандидира за гувернер, нашиот тим веднаш отиде да ги истражи приказните што ги слушавме со години, но никој не истражи целосно. Имавме едвај шест недели да работиме на ова и само започнавме да разговараме со некои од жените“, вели репортерката на „Лос Анџелес Тајмс“, Карла Хол во документарецот.

Инаку, документарната серија „Арнолд“ следи по неговата акциона серија со наслов „ФУБАР“, а премиерно ќе се прикаже на 7 јуни на Нетфликс.