Македонски и косовски државјани ќе се гонат за тероризам и ширење на идеологијата на забранетата екстремистичка група Исламска држава во Швајцарија, објави „Асошиејтед Прес“.

36-годишниот Косовец и 33-годишниот македонски државјанин кој поседувал и швајцарско државјанство, кои не биле идентификувани по име, се осомничени за индоктринација, финансирање и регрутирање за швајцарскиот огранок на „косовска терористичка организација“, претежно во областа на Женева, во текот на изминатата деценија, соопшти Канцеларијата на швајцарскиот државен обвинител.

Двајцата мажи биле уапсени во септември 2022 година во врска со истрагата за нивната наводна поддршка на групата „Исламска држава“. Се тврди дека осомничените започнале кампања за собирање поддршка и средства за „салафистичко-џихадистичка идеологија“ со надеж дека ќе го дестабилизираат Косово и ќе заземат територии за да владеат според шеријатскиот закон.

Осомничените се соочуваат со обвиненија, вклучувајќи учество во терористичка група, поткуп на јавни службеници и перење пари, како и нелегално примање одредени социјални бенефиции во Швајцарија, соопштиле од Канцеларијата на обвинителот.