Комбе кое претходно било одземено при превоз на нежигосани и бесправно исечени дрва, а кое пред околу еден месец судот му го вратил на сопственикот, повторно е одземено во нова акција на „Национални шуми“ во Прилеп, објави заменик-директорот на јавното претпријатие „Национални шуми“, Кире Михаилов.

Товарното возило било пронајдено во шумскиот склад на подружницата „Црн Бор“ – Прилеп и по вчерашната контрола повторно е одземено како доказ за кражба и нелегален превоз на огревни дрва.

„Комбето кое го гледате на сликава пред извесен период било одземено при превоз на нежигосани и бесправно посечени дрва во Прилеп… пред околу еден месец од страна на судот беше вратено. Сега, по нова кражба, повторно го одзедовме,“ пишува Михаилов во објавата.

Тој им поставува и отворено прашање на правосудните органи: За колку време судот повторно ќе го врати возилото на истиот осомничен дрвокрадец, дозволувајќи повторно нелегална сеча и принудувајќи ги шумарските служби постојано да интервенираат?