Кандидатката за градоначалник на Град Скопје од СДСМ, Каја Шукова, денеска го претстави проектот „Скопје без хартија, дигитален град за сите“, што е дел од нејзината предизборна програма.

Таа истакна дека нејзината визија за Скопје е град што функционира транспарентно, ефикасно и современо, град што им служи на граѓаните.

Објасни дека концептот „Скопје без хартија“ претставува дигитална револуција во функционирањето на градската администрација, со цел секој процес да биде брз, достапен и видлив за сите.

Според Шукова, дигитализацијата на јавните услуги е темел на новиот модел на управување.

„Преку алатката ‘Отворен буџет’, граѓаните ќе имаат постојан увид во трошењето и распределбата на јавните средства. Електронските јавни набавки обезбедуваат транспарентност и одговорност во секоја постапка“ рече Шукова.

Еден од клучните проекти во нејзината програма е „Скопје без хартија“ (Paperless City 2029), кој предвидува воспоставување на единствена дигитална платформа што ќе ги поврзува сите градски услуги, со овозможен пристап до документи и плаќања, до информации за граѓаните и бизнисите на едно место.

Во рамките на проектот е развиена и мобилна апликација преку која граѓаните и туристите ќе добиваат информации за јавен превоз, настани и услуги во реално време, што, како што истакна Шукова, ќе придонесе за поголема поврзаност и функционалност на градот.