Условите за почеток на преговорите за Северна Македонија се јасни, тоа сите го знаеме, изјави амбасадорот на Шпанија во Бугарија, Алехандро Поланко, чија земја од 1 јули годинава го презеде претседавањето со Советот на ЕУ.

„Јасно е дека, од една страна, овие барања мора да се исполнат – тоа ни е познато на сите. Исто така, добрите односи меѓу двете земји и близината меѓу нив можат многу да помогнат да се подобрат можностите за развој на оваа материја“, истакна шпанскиот амбасадор во изјава на БГНЕС.

Поланко истакна дека за Шпанија добрите односи со Бугарија се исто така многу важни.

За повиците на дел од македонската политичка елита за промена на условите во преговарачката рамка за влез во ЕУ, Поланко посочи дека во РСМ има два важни елементи за ова прашање.

„Прво, постои дијалог меѓу РСМ и Европската комисија, а од друга страна има и паралелни разговори меѓу Северна Македонија и Бугарија“, посочи Поланко.

Поланко изрази надеж дека ќе бидат исполнети сите барања и дека овие односи ќе одат во најдобра можна насока.

И Денков повтори за уставните измени

Потребата од уставни измени ја повтори и бугарскиот премиер Николај Денков кој во живо на Фејсбук страницата на Владата на Бугарија одговараше на прашања од бугарските граѓани.

– Очигледно, ова е тежок процес за нив и на некој начин болен. Тие треба да го направат тоа бидејќи тоа е во срцето на т.н европски компромис од минатата година, врз основа на францускиот предлог. Ништо повеќе не се бара од нив. Прашањето е дали се подготвени да поминат низ овој процес. Ние стриктно ќе ги следиме овие услови, овие инструкции кои се дадени во т.н европски компромис, кои се поврзани со заштитата на граѓанските права на луѓето со бугарски идентитет, рече Денков.

Тој изрази жалење поради забавување на секторските преговори, отпочнати минатата година од страна на кабинетите на Петков и на Ковачевски.

-Подготвени сме да продолжиме со работата на коридорите, на зголемување на трговската размена, културната размена, но без да се реши клучниот проблем не можеме да очекуваме сериозни резултати. Од наша страна отворени сме за се` што е позитивно, ќе иницирам и некои нови работи, имаме идеи како да продолжиме, но вистинскиот „слон во собата“ е кога тие ќе можат да ги направат измените во Уставот, рече бугарскиот премиер Николај Денков.