Шпанија ја откажа набавката на 168 лансери и 1.680 противтенковски ракети од израелската компанија „Рафаел“, објавија денес шпанските медиуми, неколку недели откако го откажа договорот со друга израелска компанија за набавка на муниција.

Договорот што беше откажан денес беше вреден 287,5 милиони евра, објави шпанскиот весник „Ел Паис“, повикувајќи се на „владини извори“, додека опремата е произведена во Шпанија по лиценца од израелската компанија.

„Започна процес на одземање на лиценци од израелско потекло“, изјавија за АФП извори од шпанското Министерство за одбрана, уверувајќи дека министерството работи „на преориентирање на програмите со цел постигнување технолошка независност и автономија“.

Шпанскиот премиер, социјалистот Педро Санчез, е еден од најкритичните гласови во Европа кон својот израелски колега Бенјамин Нетанјаху во врска со израелскиот одговор на нападот на Хамас на израелска територија на 7 октомври 2024 година.

Шпанското Министерство за внатрешни работи веќе во април одлучи да го откаже договорот за купување муниција од израелска компанија, делумно под притисок од левичарската партија Сумар, владин партнер на социјалистите.

Стануваше збор за договор за купување куршуми од израелската компанија ИМИ Системс, во вредност од 6,8 милиони евра.

Јоланда Дијаз, трета во владината хиерархија и водечка фигура во Сумар, во тоа време изјави дека Шпанија не може „да соработува со геноцидна влада (…) која го масакрира палестинскиот народ“.

Сепак, Центарот Делас, истражувачки институт со седиште во Барселона, специјализиран за безбедност и одбрана, во април процени дека Мадрид доделил 46 договори во вредност од 1,044 милијарди долари на израелски компании од почетокот на војната, според податоците собрани од платформа за јавни тендери.