Шпанските власти истражуваат маж кој оштетил слики од пештера стари неколку илјади години. Имено, тој решил да ги полие со вода за да добие подобри, односно поостри фотографии за на Фејсбук.

Еден 39-годишен маж од Андалузија објавил неколку фотографии од наводнетите слики во пештерата на Фејсбук, објави во саботата Шпанската цивилна гарда (Гардија Цивил), пишува „Си-ен-ен“.

Кога официјалните лица ги видоа фотографиите на интернет во мај, веднаш покренаа истрага, имајќи предвид дека сликите, кои се наоѓаат на различни локации во планинскиот венец Сиера Сур де Жан, се заштитени.

Кога неименуван маж ги полил со вода овие пештерски уметнички дела, настанала штета. Имено, сликите се направени на варовник, кој содржи соли растворливи во вода.

Кога варовникот ќе дојде во допир со вода, солите се раствораат и излегуваат на површината, создавајќи слој кој ги оштетува сликите.