Разрешениот директор на Клиниката за кардиохирургија доктор Марјан Шокаровски, денеска на прес-конференција презентираше различна анализа за смртноста од онаа на стручната комисија што му ја прати министерот за здравство во заминување доктор Илир Демири. Според анализата што тој ја презентираше, смртноста на Клиниката за кардиохирургија не е зголемена, нема 170 фантомски пациенти кои не биле внесени во „Мој термин“ (како што го обвини пред два дена Демири) и некој сака да ја уништи државна Кардиохирургија, но не прецизираше кој.

-Дали се работи за оркестриран напад против Државна кардиохирургија а со тоа и напад врз јавното здравство? Која е потребата на министерот во заминување да направи вакво пореметување на една успешна приказна?, праша Шокаровски.

Инаку, во салата на прес-конференцијата беше собран целиот медицински и помошен персонал кои со аплауз го дочекаа изведувањето на статистичките податоци на доктор Шокаровски. Го немаше само професорот Сашко Јовев иако Шокаровски негираше нарушени меѓучовечки односи на Клиниката. Извештајот од стручниот надзор кој го поседуваме а кој го нарача министерот Демири, се однесува и на начинот на кој Јовев бил отстранет од клиниката па вратен, за што ќе пишуваме во текот на утрешниот ден.

И Шокаровски смета дека неговото разрешување е незаконско, зашто уште има техничка влада.

Шокаровски ја дискредитираше и стручната комисија што во извештај утврди поголема смртност кај елективни кардиохируршки операции во 2023 година споредено со 2022 година (од 13 починати во 2022 бројот пораснал на 29 во 2023).

Во комисијата се  доц. д-р Никола Граматниковски, проф. д-р Горан Кондов, д-р Лилјана Ристовска Деспотовска, Стојанчо Стојковски, Жаклина Чагороска и прим. д-р Сузана Маневска.

Шокаровски не беше воодушевен од нивното кардиохируршко портфолио.

-Назначените доктори од страна на Демири немаат никаков контакт со кардиохируршки пациенти, ниту пак практично искуство во кардиохирургијата. Еден од назначените беше противкандидат за да биде назначен за директор на Клиниката, а поради тоа се доведува во прашање и неговата објективност. Да ги потсетам оние кои знаат, но и оние кои не знаат во медицината постои наука која се нарекува Медицинска статистика. Таа е единствената релевантна која може да ги даде точните проценти за работата. Тоа што се сподели од страна на медиумите беше селективно, во временски периоди како им одговарало. Тие очигледно сакале да се прикажат што полоши резултати, но и според времето во кое живееме што посензационалистички резултати, рече Шокаровски.

Според тоа што го истакна тој, прецизната статистичка анализа покажува дека нема значајно зголемување на смртноста, туку зголемување на тежината на комплексноста на пациентите за околу 20 проценти.

Постои тренд на намалување на смртноста. Последните пет месеци покажуваат дека смртноста е пониска од предвидената, односно од параметарот „Евроскор 2“, односно подобри сме од она што се очекува – рече Шокаровски.

Наспроти она кое е констатирано во стручниот надзор, дека нема креирано електронско отпусно писмо во досието за сите пациенти и дека во 2022 и во 2023 година недостасуваат голем број отпусни писма, докторот вели дека документацијата е комплетна. Демири пак пред два дена истакна дека добил информација што ќе ја пријави во Јавното Обвинителство дека на Клиниката имало 170 пациенти кои биле незаведени во „Мој термин“.

Нема фантомски пациенти. Сите пациенти имаат отпусно писмо на хартија и историја на хартија. Тоа што ги нема во ‘Мој термин‘ е поради софтверски проблем помеѓу нашата и платформата на ‘Мој термин‘. Тоа не е од сега, одамна е тој проблем, рече Шокаровски.

За Шокаровски неточно е и тоа што Демири го презентираше – дека на странски експерт од Србија, од Дедиње, му се исплаќала дневница од 700 евра. Дневницата, вели разрешениот директор – била 150 до 200 евра.

Доктор Васил Папастиев презентираше статистика од самата Клиника за кардиохирургија според која смртноста е намалена, а зголемена е комплексноста на здравствената состојба на пациентите.

-Тие бројки што се објавија во некои медиуми се како на пример вака: метеоролозите да кажат дека во Скопје просечната температура е 42. А ја мереле во 12 часот во јули, рече доктор Папастиев.

Инаку Демири поднесе кривична пријава за злоупотреба на службена положба и овластување против Шокаровски и против разрешената раководителка на програмата за превенција на кардиоваскуларни заболувања Александра Ефтимова.

ЕКСКЛУЗИВНО: „Слободен печат“ открива што содржи извештајот за смртноста на државна Кардиохирургија