Универзитетската болница во Базел, Швајцарија, во рамките на клиничката студија, им препишува пиво на пациентите на интензивна нега за лекување на ефектите од делириум.

Случајно избрани пациенти добивале половина литар пченично пиво преку желудочна цевка секоја вечер во текот на шест дена, додека на другите пациенти им давале само вода, со цел да се споредат двете групи.

Образложението е дека многу луѓе се навикнати да пијат пиво или чаша вино навечер како дел од нивната нормална дневна рутина.

– Една од можните причини за делириум е алкохолот кој пациентите редовно го консумираат во мошне мали количини. Ако повеќе не го примаат, стануваат поподложни на делириум – изјавил главниот лекар на одделението за интензивна нега во болницата, Мартин Зигeмунд, за швајцарскиот јавен сервис СРФ, пренесува Танјуг.

Делириум е состојба на дезориентација која ја доживуваат многу пациенти на интензивна нега и која предизвикува стрес, пренесува „Свис инфо“.

– Пациентите се збунети. Тие повеќе не знаат каде се. На пример, тие можат да мислат дека се во Париз или дека сакаат да ги видат своите деца иако ги немаат – рекол Зигемунд.

Оваа ситуација е исто така голем предизвик и за медицинскиот персонал и за роднините, кои немаат друг избор освен да се обидат да разговараат со пациентот на пријателски начин, но тоа не може да го спречи делириумот.

Зигемунд навел дека во текот на клиничката студија било разгледувано и прашањето за согласност на пациентите, особено затоа што некои биле во несвест.

– Во ретки случаи може да ги прашаме пациентите на интензивна нега. Во законот за истражување постои параграф кој ни овозможува да спроведеме ваква студија – рекол тој.

Од истражувањето биле исклучени одредени категории на пациенти, како трудници или лица кои претходно имале проблем со алкохолот или кои не смеат да консумираат алкохол од религиозни причини.

Околу 40 отсто од пациентите во итната помош страдаат од делириум.

Студијата во Универзитетската болница Базел се очекува да трае до 2027 година. Првите резултати се очекуваат по најмалку една година.