Шкупи го освои првиот бод оваа сезона откако ремизираше против Работнички (1:1) на дуелот што се одигра во Струга од деветтото коло во Првата македонска фудбалска лига.

Шкупи поведе во 25 минута, со голот на Ерион Шуку. Луис Рибеиро се реши за удар откосо од левата страна, голманот Јакимов не реагираше најдобро, ја испушти топката, а на Ерион Шуку не му беше тешко да ја уфрли во мрежата. До крајот на првиот дел, немаше посериозни шанси на двете страни.

Работнички тргна многу поофанзивно после паузата. Ермедин Адем се закани во 60 минута по еден корнер од десната страна, а искусниот играч за врска успеа да погоди за израмнување само една минута подоцна.

Денеска се одигра уште еден меч во шампионатот, играчите на АП Брера и Башкими одиграа нерешено 1:1 во Струмица.

Во 35 минута по брз контранапад на Башкими, Мислими центрираше од левата страна, и на вистинското место се најде Аворнио, кој со глава го совлада Вргов.

Во 85 минута, судијата Пларент Салихи покажа на белата точка за екипата на АП Брера по дуелот меѓу Пановски и Драме. По консултацијата со ВАР-системот, судијата Салихи ја потврди одлуката. Нзенгуе не греши и се погрижи за израмнување.

Истиот играч во 90 минута имаше шанса да донесе и три бода за АП Брера, но неговиот обид заврши покрај голот на Башкими.