Милиони луѓе пијат кафе секој ден, но она што го јадеме со шолја кафе е поважно отколку што мислиме, бидејќи постојат намирници кои никогаш не треба да се мешаат со кафе. Стручњаците предупредуваат дека одредени намирници можат да се „судрат“ со кафето, што значи дека можат да го вознемират желудникот или да го спречат телото да апсорбира клучни хранливи материи, пишува „Е-клиника“.

Којa храна не треба да се меша со кафе?

За да избегнеме проблеми со болки во желудник или блокирање на апсорпцијата на хранливи материи, нутриционистите препорачуваат како да се извлече максимум од кафето и храната.

1. Цитруси

Пиењето кафе за време на консумирање цитруси може да предизвика дигестивни тегоби, бидејќи кафето е природно кисело. Нивото на pH на кафето е во просек меѓу 4,85 и 5,13 на скала од 0 до 14, при што пониските броеви означуваат зголемена киселост. Цитрусите и нивните сокови се многу кисели и можат да придонесат за гастроезофагеална рефлуксна болест (GERB), која предизвикува мачнина, подуеност и горушица. Комбинацијата на кафе и цитруси може да ја иритира слузницата на желудникот и да ги влоши симптомите. Исто така, остриот вкус на цитрусите може да го промени вкусот на кафето, правејќи го горчливо и непријатно.

2. Црвено месо

Истражувањата покажуваат дека кафето може да влијае на апсорпцијата на хранливи материи, особено железо. Црвеното месо е еден од најдобрите извори на хем-железо, но пиењето кафе заедно со стек може да ги намали неговите здравствени придобивки. Железото има клучна улога во организмот – поддржува циркулација, создавање хормони и имунолошка функција. Недостатокот на железо води кон анемија, еден од најчестите нутритивни проблеми.

3. Млеко

Млекото е одличен извор на калциум, важен за здрави коски, мускулна функција, коагулација на крвта и производство на хормони. Една шолја обезмастено млеко покрива околу 23 отсто од дневните потреби за калциум. Но, комбинирањето кафе со млеко може да ја намали апсорпцијата на калциум, кој потоа се излачува преку урината. Високото излачување на калциум е поврзано со зголемен ризик од камен во бубрези и проблеми со здравјето на коските.

4. Пржена храна

Зголемена консумација на кафе може да го зголеми ризикот од дислипидемија – абнормални нивоа на масти во крвотокот. Три или повеќе шолји кафе дневно можат да го зголемат „лошиот“ холестерол и да го намалат „добриот“ холестерол, што негативно влијае на срцевото здравје. Бидејќи пржената храна исто така е поврзана со ризик од кардиоваскуларни заболувања, најдобро е да се ограничи ако редовно се пие кафе.

5. Обогатени житарки за појадок

Многу житарки се збогатени со витамини и минерали, како цинк, кој е есенцијален за многу процеси во телото. Но, кафето може да ја намали биорасположливоста на цинкот. Иако нема доволно истражувања кои ја разгледуваат оваа врска, препорачливо е кафето и житарките да не се консумираат заедно.

6. Храна со висока содржина на натриум

Кафето содржи биолошки активни соединенија кои влијаат врз крвниот притисок. Иако една до три шолји кафе дневно обично не се проблем, прекумерниот внес на кофеин може да ја влоши хипертензијата. Од друга страна, внесот на натриум директно е поврзан со висок крвен притисок. Затоа е добро да се внимава кога кафето се комбинира со храна богата со сол. Американското здружение за срце препорачува максимум 2.300 милиграми натриум дневно.