Шестмина кандидати на германската екстремнодесничарска партија Алтернатива за Германија (АФД) починаа во последните недели пред локалните избори во Северна Рајна-Вестфалија, најнаселената германска покраина со 18 милиони жители. Полицијата соопшти дека нема ништо сомнително во смртните случаи, но околностите предизвикаа бројни шпекулации на социјалните мрежи, јавува Би-Би-Си.

Локалните избори ќе се одржат на 14 септември, со учество на околу 20.000 кандидати. Поради починатите кандидати, ќе мора да се печатат нови гласачки ливчиња, а гласачите кои веќе гласале по пошта ќе треба повторно да гласаат.

Според Сојузното министерство за внатрешни работи, во истиот период починале и кандидати од други партии, меѓу кои Зелените и Социјалдемократите. Сепак, копретседателката на АФД, Алис Вајдел, го сподели тврдењето на пензионираниот економист Стефан Хомбург дека бројот на смртни случаи е „статистички речиси невозможен“, оставајќи простор за шпекулации.

Заменик-командантот на АФД во покраината, Кеј Готшалк, повика случаите да бидат истражени, но предупреди да не се влегува во сферата на теории на заговор без докази.

АФД, која во февруари стана втора најголема партија на федерално ниво, очекува силен резултат и во Северна Рајна-Вестфалија. На последните локални избори во 2022 година партијата освои 5,4%, но на федералните избори годинава доби 16,8% во покраината – што дава надеж за повторување на успехот и на 14 септември.