Фудбалерите на Милсами Орхеј ја освоија шампионската титула во првенството на Молдавија по втор пат во својата историја. Ова се случи по ремито 0:0 на гостувањето кај Шериф Тираспол во последното 24 коло од шампионатот, што беше директна пресметка за првото место.

Со постигнатиот нерешен резултат, Милсами собра 21 бод во плејоф фазата од првенството, што е еден повеќе од екипите на Зимбру и Шериф, кои го освоија второто, односно третото место.

По првиот дел од првенството, во кој екипите одиграа 14 натпревари, Милсами беше на петтото место со 21 бод, додека Шериф беше убедлив лидер со 36 бода. Сепак, чудниот формат на домашното првенство значи дека бодовите од првата фаза немаат апсолутно никакво значење за конечниот пласман, бидејќи се ресетираат пред почетокот на плејофот.

Во обете фази од првенството, Шериф не дозволи ниту еден пораз – 11 победи и три нерешени резултати во првата фаза и пет победи и пет нерешени резултати во втората фаза, но тоа не беше доволно за најуспешниот тим во историјата на молдавската лига да ја додаде 22 титула во својата колекција.

За Милсами ова е прва титула од сезоната 2014/15, а за прв пат во новиот век, Молдавија има шампион во две сезони по ред кој не е Шериф Тираспол. Минатата година, титулата ја освои тимот на Петрокуб Хинчешти, кој сега заврши на четвртото место со 14 бодови.