Поранешната министерка за одбрана, Радмила Шекеринска се заблагодари на честитките за нејзиното назначување за заменик генерален секретар на НАТО алијансата.

„Вашите искрени честитки многу ми значат и ми даваат дополнителна сила и мотивација за предизвиците што претстојат. Се извинувам што не можам да одговорам на сите ваши пораки поединечно. Пред мене е одговорност, која бара целосна посветеност и работа на теми кои се клучни за глобалната безбедност и стабилност. Ќе продолжам да се залагам за вредности што ги зацврстуваат мирот, соработката и интеграцијата меѓу земјите членки на НАТО, но и да ја претставувам Северна Македонија со гордост на оваа висока меѓународна позиција“, напиша Шекеринска на социјалните мрежи.

Вели дека секој збор на поддршка е и потсетник дека успехот не е само личен, туку е и успех за нашата држава.

„Заедно покажуваме дека Северна Македонија има што да понуди на глобално ниво. Ви благодарам од срце! Вашата поддршка ми значи многу“, додава Шекеринска.

Државниот врв сè уште не упати честитка за оваа висока функција, на која првпат застанува политичар од Македонија, но и од Западен Балкан.