Помагањето на Украина е вложување во нашата безбедност, изјави заменик-генералниот секретар на НАТО, Радмила Шекеринска во интервју за Хрватската радио телевизија – ХРТ, на маргините на Форумот во Дубровник.

Таа вели дека земјите членки на НАТО треба праведно да го делат товарот на распределбата на средствата за одбрана, зборувајќи за испраќањето оружје во Украина и зајакнувањето на одбранбената индустрија.

„Разговараме за тоа како да ја поддржиме Украина уште од почетокот на бруталната руска војна. Мислам дека голем број сојузници навистина ја покажаа својата поддршка. На овој самит рековме дека безбедноста на Украина е поврзана со нашата безбедност. Некои рекоа дека тоа е првата линија на одвраќање и одбрана. Ако ја поддржиме Украина, инвестираме во нашата безбедност“, посочува Шекеринска во интервјуто.

Според неа, самитот на НАТО бил историски и пораката била јасна – Алијансата да биде посилна кога станува збор за одвраќање на агресијата.

„Но, трансатлантското единство не е само зборови и убави говори. Од една страна, тоа е силна посветеност на САД кон НАТО, членот Пет и европската безбедност. Но, таа посветеност носи и очекувања дека европските сојузници и Канада ќе сторат повеќе. И дека нема да сметаат само на фактот дека Американците ќе го носат најголемиот дел од товарот. Затоа самитот беше историски“, вели Шекеринска.

Во тој контекст, Шекеринска потенцира дека сите 32 сојузници се согласиле дека Русија и тероризмот сè уште се најголемите закани за евроатлантската безбедност.

„Безбедноста на Украина е поврзана со нашата безбедност. И за да ја гарантираме таа безбедност во децениите што претстојат, како што беше во изминатите 75 години, мора да инвестираме повеќе во одвраќање, одбрана и безбедност. Одлично е што земјите се обврзаа на 5%, но тоа е неопходно“, рече таа.

Ако НАТО сака да одвраќа агресија, руска или која било друга, според Шекеринска, Алијансата мора да покаже дека не само што има пари, туку и дека е способна за тоа.

„Сите сојузници се согласија за ова еден месец пред самитот. Министрите за одбрана се согласија за сите цели: што мора да стекнеме, за што мора да ги обучиме армиите, каква е воената стратегија што сите ќе ја следиме“, додава Шекеринска.