Во израелски напад врз зграда во густо населен кварт на Бејрут денеска е убиен шефот за односи со медиумите на Хезболах, Мохамад Афиф, изјавија за Ројтерс два либански безбедносни извори, иако Хезболах се уште не ја потврдил информацијата.

Израелската армија одби да ги коментира информациите на прашањето на Ројтерс. Нападот го погоди округот Рас ал Наба, каде што се населиле бројни жители раселени од јужните предградија на Бејрут, барајќи засолниште од израелските бомбардирања.

Безбедносни извори соопштија дека при нападот е  погодена зградата во која се наоѓаат канцелариите на партијата Баас, а лидерот на партијата во Либан Али Хиџази за либанската ТВ Ал Џадид изјавил дека во зградата во тој момент бил и Афиф.

Во соопштението за печатот на либанското Министерство за здравство, се наведува дека во нападот едно лице загинало, а три други се ранети.

Ројтерс јавува дека се слушаат возила на брза помош како брзаат кон местото на нападот, додека во исто време одекнувале рафални истрели за да спречат толпи луѓе да се обидат да се приближат до местото.