Идниот закупувач на фабриката БИП ќе биде обврзан да вработи најмалку 100 лица кои биле вработени во таа фабрика и да произведуваат повеќе од 5.000 хектолитри пиво месечно, но и да продолжат со производство на оцет.

Краен рок за поднесување на понудите е 18. јули.

Компанијата „М6 ЕДЕН СРБ“, сопственост на македонскиот бизнисмен Светозар Јаневски, беше две години закупувач на погоните на БИП.

Оттаму во петокот рекоа за „Б92“ дека го прекинале договорот за закуп кој траеше од 2017 година.

Државниот секретар во Министерството за економија, Драган Стевановиќ, за „Прва ТВ“ изјави дека државата ќе најде нов закупувач што е можно поскоро со цел да продолжи со производството во една од најпознатите пиварници во регионот.

За потсетување, пред две години БИП беше изнајмена од фирмата „М6 ЕДЕН СРБ“, која ја предводи македонскиот Светозар Јаневски, а при што беше рестартирано производството на пиво.

Закупот чинеше околу 900.000 евра годишно, беа ангажирани 150 работници, а Јаневски, кој ја поседува винарската визба Тиквеш, најави изградба на нова фабрика за пиво во Србија.

По тој повод, тој најави дека закупот на БИП ќе трае 2-3 години, додека новата фабрика за пиво не биде изградена, како и дека ќе се договори со Владата на Србија за локацијата на новата фабрика.

Мнозински сопственик на БИП е државата Србија, која според Регистерот на акции и удели има 51,9%, додека остатокот е во рацете на малцинските акционери.

БИП за прв пат беше приватизирана во 2007 година, потоа конзорциум на правни лица Алита од Литванија и Јунатед нордик бевереџес од Шведска, а поради неисполнување на обврските овој договор беше прекинат во 2010 година. БИП моментално е во банкрот, а сите работници во производството се на одмор до 16 јули, кога очекуваат дека производството ќе продолжи.