Колумбиската пејачка Шакира постигна договор со шпанското обвинителство непосредно пред почетокот на судскиот процес за даночна измама во Барселона.

Имено, таа беше обвинета за „сериозно“ даночно затајување од 14,5 милиони евра, во периодот меѓу 2012 и 2014 година.

Со спогодбата се стави крај на судскиот процес, а обвинителството ја замени затворската казна со парична казна – двете страни се договориле таа да плати казна од 7,5 милиони евра.

Шпанското обвинителство во јули годинава најави дека ќе бараат затвор до осум години и парична казна од 24 милиони евра, ако Шакира биде прогласена за виновна.

Првичко, случајот беше покренат во 2018 година и беше заснован на тврдењето дека Шакира од 2012 до 2014 поминала повеќе од шест месеци годишно како жителка на Шпанија, што ја обврзувало да ѝ плати данок на државата.

Таа тврдеше дека не престојувала толку во Шпанија во тој период и првично одби да се спогоди со обвинителите.

Инаку, Шакира живееше 11 години со поранешната фудбалска ѕвезда Жерар Пике, со кој има две деца. Пејачката, чие целосно име е Шакира Изабел Мебарак Рипол, се пресели во Мајами по нивното разделување.