Луѓето не се единствените кои се борат со сезонските алергии. Во интервју за „Пипл“, ветеринарот Мајкл Натал откри дека сезонските алергии, како и вообичаените алергии, се чести кај кучињата и мачките.

„Секое животно може да има или да развие алергии. Исто како и луѓето, тие можат да ги развијат како што стареат. Тоа се случува почесто отколку што мислат повеќето луѓе“, објаснува Натал.

Ветеринарот наведува дека третманите за алергии кај кучињата и мачките зависат од тоа колку животното е алергично на нешто. На пример, неговиот ротвајлер има тешки алергии, поради што мора да прима инјекции против алергија секоја недела, а исто така има и  посебен режим на исхрана.

Исто така, Натал забележува дека постои една алергија која често се јавува кај домашните миленици.

„Често гледам животни алергични на пилешко, кое може да се најде во многу производи за домашни миленици“, објаснува тој.

За да им помогнат на домашните миленици кои се борат со алергии, сопствениците прво треба да посетат ветеринар или ветеринарен дерматолог кој прави тестови за алергија за да открие кои алергени им пречат на нивните миленици.

„Ако го знаете алергенот, обидете се да не го изложувате вашето домашно милениче на тој алерген. Прочитајте ги состојките на производите и користете лекови за алергија што ви ги препишал вашиот ветеринар. Најважно е да го однесете вашето домашно милениче на преглед доколку чувствувате дека нешто не е во ред со него“, објасни ветеринарот.