Македонските одбојкари не успеаа слават против Чешка во денешнио последен натпревар од групната фаза, па така во осминафиналето ќе мораме да играме против актуелниот светски шампион Италија.

Чешка во „Борис Трајковски“ денес беше подобра со 3:0 во сетови (19:25, 23:25, 17:25).

Македонија денес правеше премногу сервис грешки и немаше решение за расположените Марек Шотола и Лукас Вашина. Чесите едноставно покажаа дека во овој момент се поквалитетна селекција од нас и заслужено се изборија за осминафинале против Србија.

Шотола и Вашина само во првиот дел заедно освоија 18 поени, а подоцона следуваа и наши седум сервис грешки што беа премногу за да се надеваме на некаков позитивен резултат. Единствено париравме во вториот сет, но за тој сет клучен беше поенот кога на 23:24 капитенот Никола Ѓорѓиев беше изблокиран, па Чешка го освои сетот за 2:0.

Третиот сет целосно им припадна на Чесите, водеа од почетокот до крајот, а ние полека почнавме да се предавме. Македонија групната фаза ја завршува со две победи против Данска и Црна Гора и три порази од Полска, Холандија и Чешка.

Сепак, самиот пласман помеѓу најдобрите 16 репрезентации во Европа е историски успех за Македонија.