Сензационално археолошко откритие: Конечно знаеме како навистина изгледала Клеопатра?
Докторката по археологија Кетлин Мартинез тврди дека ја решила мистеријата, иако сите нејзини колеги не се согласуваат со неа.
Препорачано
Статуата откриена во гробницата на Клеопатра, наводно, го открива вистинското лице на египетската кралица. Египетско-доминиканската археолошка мисија во соработка со Националниот универзитет Педро Хенрикез Урења, предводена од докторката по археологија Кетлин Мартинез, открила нови артефакти и церемонијални предмети од доцниот Птоломејски период, пишува The New York Post.
Една од најзначајните е статуата на жена од бел мермер украсена со кралска круна, за која водечкиот експерт верува дека го открива лицето на Клеопатра VII, објави Дејли њуз Египет. Мартинез, која скоро 20 години ја бара гробницата, верува дека статуата го покажува вистинското лице на кралицата која владеела од 51 до 30 година п.н.е.
Меѓутоа, другите експерти не се согласуваат, забележувајќи неколку црти на лицето кои се разликуваат од познатите прикази на кралицата. Наместо тоа, некои сугерираат дека ја прикажува принцеза од династијата Птоломеј.
Тимот, исто така, пронашол статуа на крал кој носи покривка на главата немес и 337 монети, од кои многу го прикажуваат ликот на кралицата Клеопатра VII.
Сите се откриени во храмот Тапосирис Магна, кој се наоѓа западно од Александрија, под јужниот ѕид на надворешниот периметар на храмот. Во последните години, археолозите во Египет открија и мумија стара 2.000 години со златен јазик во гробницата. Храмот е поврзан со сложен систем на длабоки тунели кои се протегаат од езерото Мариут до Средоземното Море. Се верува дека тоа е последното почивалиште на египетската кралица – скриена гробница каде што се верува дека била погребана со нејзиниот несреќен љубовник Марко Антонио по нивните самоубиства.
Мартинез долго верувала дека гробницата на кралицата е скриена некаде во урнатините на храмот, кои се наоѓаат на врвот на тунелот долг 4.281 метар, 43 метри под земја, пишува Дејли мејл. Таа тврди дека телото на Клеопатра било преместено од палатата низ тунел и закопано на тајна локација. Сепак, други експерти не се согласуваат околу мистеријата долга повеќе од 2.000 години во врска со точната локација на нивната гробница.
