Кашмира Булсара, сестрата на легендарниот Фреди Меркјури, наводно потрошила повеќе од 3,5 милиони долари за да дојде до негови лични предмети, откако тие беа понудени на аукција од страна на неговата поранешна партнерка, Мери Остин, која го наследи неговиот имот.

Кога дознала дека Остин продава дел од предметите, Булсара била длабоко потресена и одлучила да ги задржи тие споменици во семејството. Таа и нејзиниот син Џамал Зук учествувале на аукцијата и купиле неколку од предметите, притоа останувајќи анонимни за Остин да не дознае дека тие се заинтересирани за нив.

„Кашмира беше лута и вознемирена кога виде дека многу предмети од нејзиниот сакан брат станаа достапни за секој да ги купи“, изјавил извор за странски медиуми, пренесува „Дејли мејл“.

Изворот додал дека таа прво отишла на приватно разгледување на предметите, а потоа го испратила својот асистент во „Сотби“ да лицитира во нејзино име. Аукцијата ја следела преку интернет и му кажувала на асистентот колку пари да понуди.

„Имаа издвоено голем буџет, па на крајот беа задоволни од сумата, иако платиле далеку повеќе од проценетата вредност за секој предмет. Кашмира знае колку Фреди беше обожаван ширум светот, но ја растажуваше мислата дека некои од неговите сентиментални работи нема да останат со неговите најблиски“, додал изворот.

Меѓу предметите што ги купила сестрата на Меркјури се вклучува и елек вреден 163.000 евра со насликани мачки на пејачот, кој тој го носел во спотот за песната „These Are The Days Of Our Lives“, шест месеци пред неговата смрт.

Најверојатно платила и повеќе од 474.000 евра за џубокс, и над 326.000 евра за осум страници рачно напишани стихови од песната Killer Queen од 1974 година. Најмногу пари, над 533.000 евра, дала за воена јакна направена специјално за Меркјури за неговиот 39. роденден.

На аукцијата биле продадени и други предмети, како ламба направена од ваза „Даум персимонс“, дуксерка од „Најк“, и коцкаста чинија за мраз.

Мери Остин претходно продаде над 1.400 лични предмети од Фреди за вкупно 14,2 милиони евра. Аукцијата се одржа во 2023 година по изложбата „Фреди Меркјури: неговиот свет“ (Freddie Mercury: A World of His Own), на која за првпат беше прикажана неговата приватна колекција од домот „Гарден лоџ“. Колекцијата остана речиси недопрена 30 години по неговата смрт, а остана во сопственост на Остин.

Изложбата ја посетија над 140.000 луѓе, по што се одржаа шест аукции. На една од нив беше продаден и саканото пијано на Меркјури – „Јамаха бејби гранд“, на кое тој ги создаде хитовите „Bohemian Rhapsody“ и „Don’t Stop Me Now“. Пијаното беше продадено за речиси 2 милиони евра.

Остин претходно продаде и рачно напишан нацрт за „Bohemian Rhapsody“, сатенска јакна во боите на виножитото, сребрена алка и многу други предмети.

Дел од приходот Остин ги доираше на фондацијата во чест на пејачот, а која помага на пациентите кои се соочуваат со ХИВ, како и на фондацијата на Елтон Џо за заразените од ХИВ. По аукциите, таа објасни зошто решила да ги продаде некои од предметите.

„Дојде време да донесам тешка одлука и да затворам едно многу посебно поглавје од мојот живот. Треба да ги средам моите работи. Одлучив дека не би било соодветно да ги чувам скриени. Ако планирав да ги продавам, морав да бидам храбра и да продадам многу од нив“, изјавила таа.

Да потсетиме, Меркјури и Остин се запознале во 1970 година, кога тој бил млад и амбициозен музичар. Наскоро се вселиле заедно и се вериле во 1973. Три години подоцна, Меркјури ѝ признал на Остин дека е хомосексуалец. Иако никогаш не се венчале, тој ја нарекувал своја сопруга. Останале најдобри пријатели до неговата смрт на 24 ноември 1991 година, поради воспаление на белите дробови предизвикано од СИДА.