Стартот со две победи во претквалификациите за Европското првенство 2025 внесе оптимизам во кошаркарската репрезентација на Македонија. Но, прашање е дали претквалификациите ќе продолжат како што ни тргнаа? Тоа многу зависи од изборот на играчи што селекторот Александар Јончевски ќе ги има во ноемврискиот „прозорец“, кога дома играме со Норвешка (10-ти) и со Данска (13-ти). Селекторот веќе размислува за тоа. Поради клупски обврски, учеството на клучниот играч Ненад Димитријевиќ (Уникс Казан) во ноември е во прашање. Не се знае ни дали Андреј Јакимовски (Вашингтон стејт, НЦАА), исто така важен дел од тимот, ќе може да учествува во двете ноемвриски средби.

– Следува ноемврискиот „прозорец“ и прашање е кои играчи ќе се појават? Јакимовски е на студии во Америка и добро беше што за првите два натпревари успеавме да го „извлечеме“. Димитријевиќ има клупски натпревари на истите датуми во ВТБ лигата, така што прашање е дали ќе биде ослободен – вели селекторот Јончевски.

Toj ja дообјаснува ситуацијата:

– Претпоставуваме дека Јакимовски нема да може, но не се откажуваме. Имаме контакти со неговиот тим, со тренерот. Ќе направиме се што е можно, се работи за негово вкупно отсуство од шест-седум дена. Се е изводливо. Тој секако сака да дојде, многу сака да игра за репрезентацијата. Ако дозволи универзитетот, ќе биде добро за сите – вели Јончевски.

Ситуацијата со Димитријевиќ е можеби уште потешка:

– Јасна е политичката ситуација. Се работи за руски клуб, кој ќе оди против пропозициите на ФИБА, која ја тргна Русија од сите натпреварувања. Рускиот клуб дефинитивно ќе прави проблеми. Се е можно, но морам да кажам, многу тешко – објаснува селекторот зошто Димитријевиќ е многу незивесен за ноември.

Во КФСМ почнале активности за ангажирање странец.

– За странец се размислува. Првпат по долго време Македонија почна квалификации без натурализиран играч. Многу посилни репрезентации го користат правото за странец. Размислуваме и ние. Која позиција да пополниме? Планирав тоа да биде играч на високите позиции, со оглед на тоа што на другите позиции имаме многу повеќе опции: Димитријевиќ, Магдевски, Војдан Стојановски, Кристијан Николов, Бобан Стајиќ. Имаме плејада играчи кои можат да одговорат. Високите позиции ни беа проблем за овој циклус. Моравме со играчи кои играат ниско крило да ја пополнуваме позицијата пет. Сега се разгледува можноста за странец на една од двете позиции (центар/надворешен играч н.з.). Ќе видиме кој ќе биде вистинската опција во дадениот момент. Во преговори сме со повеќе играчи, но нема ништо конкетно во моментов. Кога ќе знаеме кој ќе може да дојде во ноемврискиот прозорец, ќе видиме за каков профил играч ќе се одлучиме – вели Јончевски, кој како селектор дебитира со две победи.

Селекторот е задоволен со стартот.

– Задоволен сум од двете победи. Многу повеќе сум задоволен од играта што ја покажавме во Данска без разлика што мечот го добивме со „среќен шут“ за три поени (Димитријевиќ со звукот на сирената н.з.). Но тој шут го заслуживме со она што го покажавме на мечот. На мечот со Словачка спроведуваме дел од замислите што ги поставивме. Но се чувствуваше замор. Момците немаа многу одмор, што се одрази на стартот на мечот кога имавме многу изгубени топки. Противниците постигнуваа лесни поени. Системот што го поставивме профункционира во последната четвртина, поведовме со добра разлика за победа – вели Александар Јончевски.

Македонија ја совлада Данска со 73-70, а Словачка со 79-75 во првите две кола. Сега е на второто место (Група Д) со ист број бодови (4) како и Норвешка. Ни преостануваат средбите со Норвешка и Данска (ноември) и Словачка и Норвешка (февруари). Само првопласираниот во групата оди директно во квалификациите.