Во пресрет на Квалификациите за Европското првенство 2025, Јука Тојала, селекторот на естонската кошаркарска репрезентација, го објави скратениот список од 14 играчи за мечот од првото коло со Македонија што ќе се игра во Скопје, на 23 февруари.

Притоа Тојала даде изјава за Кошаркарската федерација на Естонија оценувајќи ја нашата репрезентација и што очекува од мечот.

– Македонија има за нас познат состав, но кога и да одите да играте со нив, треба да размислите кој странски играч ќе го имаат во тимот. Моментно во ростерот имаат двајца странски играчи, Ти Џеј Шортс кого го познаваме од мечот во Талин минатото лето (Претквалификации за пласман на ЛОИ 2024 н.з.), а новото име е Итан Хап. Хап е кошаркар кој постепено станува играч на евролигашко ниво. Мораме да бидеме подготвени за двете опции А и Б и соодветно да ја подготвиме нашата тактика. Во секој случај, играњето во Македонија е предизвик бидејќи играат во мала сала. Атмосферата таму никогаш не е лесна за гостинската екипа и мораме да бидеме подготвени тактички, а особено психички. Но, имаме искусни играчи и ние сме подготвени за тоа – вели Тојала.

Мечот со Естонија во Скопје може да биде клучен за пласманот на Македонија на Европското првенство 2025.

Во списокот на Тојала има двајца играчи од Евролигата, крилото Сандер Раиесте и центарот Маик Калев Коцар, кои играат за Басконија.

Три дена по мечот со Естонија играме со Полска на гости. По февруарскиот циклус, во ноември играме со Литванија дома и на гости, а квалификациите ни завршуваат во февруари 2025, со мечевите со Естонија и Полска.

Скратен список на Естонија: Кристијан Куламае (Билбао, Шпанија), Каспер Сурорг (Талтек, Естонија), Март Розентал (Тарту, Естонија), Јонас Рисма (Бриндизи, Италија), Мик Јуркатам (Калев/Крамо, Естонија), Јанари Јесар (Анвил Влоцлавек, Полска), Сандер Раиесте (Басконија, Шпанија), Артур Конончук (Олденбург, Германија), Сим-Сандер Вене (Сан Пабло Бургос, Шпанија), Каспар Треер (Динамо Сасари, Италија), Грегор Хермет (Калев/Крамо, Естонија), Микел Кирвес (Калев/Крамо, Естонија), Матијас Тас (Остенде, Белгија), Маик-Калев Коцар (Басконија, Шпанија).

Јончевски го објави поширокиот список за натпреварите против Естонија и Полска