Можеби ќе сакате да размислите за промена на вашата исхрана бидејќи ново истражување предупредува дека одредени намириници може да го зголемат ризикот од развој на деменција. Секако, никој не е совршен кога е исхраната во прашање и сите повремено посегнуваме по оброк за кој знаеме дека не е најздрав. Но, на долг рок, некои избори во нашата исхрана може да имаат негативно влијание врз нашето здравје, особено во подоцнежниот живот.

Новото истражување открива дека редовното консумирање црвено месо, особено она богато со заситени масти, може да го забрза когнитивниот пад и да го зголеми ризикот од деменција. Студијата, објавена на 15 јануари во „Неуролоџи“ (Neurology), медицинското списание на Американската академија за неврологија, се фокусираше конкретно на влијанието на црвеното месо врз здравјето на мозокот.

Научниците го дефинираа необработеното црвено месо како говедско, свинско, јагнешко и хамбургери. Од друга страна, преработеното црвено месо вклучува производи како сланина, виршли, колбаси и салама. Овие намирници често се солени, чадени, сушени или хемиски третирани за да се продолжи рокот на траење.

Според авторот на студијата, д-р Донг Ванг од болницата „Бригам енд воменс“ во Бостон, заситените масти во црвеното месо може да го зголемат ризикот од дијабетес тип 2 и срцеви заболувања, кои се поврзани со полошо здравје на мозокот.

„Нашата студија покажа дека преработеното црвено месо може да го зголеми ризикот од когнитивно опаѓање и деменција“, вели д-р Ванг.

Добрата вест е дека ризикот може да се намали со префрлување на поздрави алтернативи.

„Со замена на црвеното месо со јаткасти плодови, риба или живина, не само што можете да го намалите ризикот од деменција, туку и да го подобрите целокупното здравје на мозокот“, заклучил д-р Ванг.

Затоа, ако често консумирате сланина, колбаси или хамбургери, размислете да ги замените со поздрави опции. Јаткастите плодови, рибата и живината не се поздрави само за мозокот, туку и за целото тело. Малите промени во вашата исхрана денес можат да ви помогнат подоцна да уживате во подобар квалитет на живот.