Ракометарите на Е. Пелистер конечно во петтиот натпревар ја забележаа првата победа во Лигата на Европа. Пелистерци во Битола со 33:26 го совладаа Тримо Требње и му се реваншираа за поразот од претходното коло, а притоа конечно прикажаа игра која фановите ја очекуваат од нив.

Најавите на тренерот Жељко Бабиќ дека вечерва ќе настапи „еден друг“ Е. Пелистер се остварија, ги немаше грешките од претходниот натпревар и покажаа дека заслужуваат повеќе од три бода на своето салдо, колку што имаат по пет одиграни кола.

Воведните минути им припаднаа на гостинските ракометари кои имаа гол предност се до контранападот на Маџовски со кој битолчани за прв пат поведоа (5:4). Оттогаш избраниците на тренерот Бабиќ ги презедоа работите со своите раце и на полувремето веќе имаа шест гола предност (20:14). Во второто полувреме, благодарение на одличната игра во одбраната, битолчани рутински ја одржуваа предноста од шест до осум гола за во самиот финиш да дојдат и до највисоките девет гола разлика (33:24). Опуштањето во последните минути им дозволи на гостите само да го ублажат поразот.
Стипе Мандалиниќ беше убедливо најдобар ракометар на теренот постигнувајќи дури 11 гола, Кусан даде шест, Маџовски и Граѓан четири, а по три гола дадоа Костески и Велковски. Во редовите на Тримо Требње најрасположен за игра беше Расо со осум гола.

фото: Е. Пелистер