Многу европски земји забележаа огромен пораст на бројот на туристи, а некои локации почнаа да воведуваат одредени мерки за справување со негативните ефекти. Британксиот весник „Мирор“ претставува листа од седум европски земји кои воведоа нови мерки за борба против големиот број посетители.

Во последниве години, Италија спроведе различни мерки за борба против влијанието на прекумерниот туризам. Во Венеција, УНЕСКО предупреди дека може да има „ненадоместлива штета“ на историскиот центар и затоа е воведен дневен билет за посетителите. Цената на билетот е пет евра, а ова е воедно и прв ваков случај во светот во кој градот наплаќа влез. И Грција одлучи да воведе билети на одредени туристички дестинации.

Островите Санторини и Миконос исто така воведоа одредени мерки насочени кон намалување на бројот на патници на островите. Борбата против преголемиот број туристи со месеци е една од главните теми во Шпанија, а поради тоа се одржуваат и протести. Во Барселона е воведена туристичка такса која се движи од 5,25 до 6,75 евра за ноќ.

Дубровник во Хрватска воведе нови мерки за туристите кои го посетуваат градот на светското наследство на УНЕСКО, вклучувајќи забрана за шетање во костими за капење, возење без посебна дозвола, консумирање храна и пијалоци околу спомениците на културата и искачување по градските ѕидини.

Француската министерка за туризам, Оливија Грегоар, неодамна претстави план за борба против „вишокот туризам“, вклучувајќи мерки за регулирање на приливот на туристи и поддршка на локалните власти кои се соочуваат со зголемување на бројот на туристи. Во австрискиот град Халштат се преземени мерки за намалување на бројот на туристи кои ја посетуваат живописната област со изградба на дрвени огради кои го блокираат погледот на езерото и областите популарни за фотографирање. Најновите мерки во кампањата на Амстердам против прекумерниот туризам вклучуваат ограничување на бројот на крстарења по реките што влегуваат во водните патишта на холандската престолнина. Се планира и намалување на бројот на ноќевања со забрана за изградба на нови хотели.