Со слоганот „Под исто небо“, седмото издание на Меѓународниот фестивал за литература и илустрација за деца „Литера“ ќе се одржи од 23 до 25 април во Сули ан во Скопје. Фестивалот годинава ќе ја прослави моќта на литературата и илустрацијата како универзален јазик што ги поврзува децата од различни култури и општества.

Во рамките на „Литера 2025“ ќе се организираат интерактивни работилници, средби со автори и илустратори, како и специјални настани посветени на креирање нови литературни и визуелни светови. Децата љубители на книги ќе можат да уживаат во раскажувачки сесии, креативни игри и разговори со гости од светот на детската книжевност.

Фестивалот ќе биде збогатен со повеќе изложби на илустрации и сликовници, меѓу кои и посебна ретроспективна изложба посветена на Орде Манески – еден од доајените на македонската илустрација.

– Посебен печат на минатогодишното издание на „Литера“ остави наградата за најдобар фестивал, признание што ни беше доделено на БЕАМ (Best Event Awards Macedonia), а тоа ни е мотив и оваа година да организираме едукативно, забавно и шарено фестивалско доживување со прекрасни илустрации и приказни за деца – вели Софија Семенпеева Трајановска, креатор и организатор на „Литера“.

Фестивалот останува верен на својата мисија – да ја поттикне љубовта кон книгите, да го промовира значењето на илустрацијата како клучен елемент во детското образование и да создаде простор каде што приказните можат да патуваат без граници.

Во изминатите шест изданија на „Литера“ се одржаа вкупно 13 изложби во Македонија и во странство, над 50 работилници за деца, 11 мастер класови за илустратори и автори, како и 10 конференции и трибини.

(Текстот е објавен во „Културен печат“ број 277, во печатеното издание на весникот „Слободен печат“ на 18-21.4.2025)