Со резултат 5:0 швајцарскиот претставник Лозана ја анулира негативата од 2:1 од Скопје против Вардар и продолжува во третото квалификациско коло во Лигата на конференции на УЕФА.

За скопските „црвено-црни“ евро настапите завршуваат и сега се концентрираат на домашните натпреварувања – лигата и Купот каде атакуваат на двата трофеи.

– Честитки за Лозана за заслужената победа и пласманот понатаму. Тежок резултат за нас, како клуб. Тежок резултат за мене како тренер, за играчите, за навивачите и за сите кои го сакаат Вардар. До првиот примен гол игравме добро, по што тотално се растуривме. Тим како Лозана не простува и секоја шанса беше гол. Дали теренот и вештачката трева, дали резултатот и победата од Скопје, нешто нè понесе. Знаевме дека има врвни играчи во Лозана.

Мора да се кренеме, имаме тежок прв натпревар, дербито на Македонија против Пелистер во Скопје. Европа сезонава беше награда за нас, знаејќи каде бевме минатата сезона и како стигнавме до тука. Почнува првенството, ќе има борба и многу докажување – рече Гоце Седлоски, шефот на стручниот штаб на Вардар.

Првенството на Македонија, сезоната 2025/26 почнува на 8 август. Во рамките од првото коло Вардар ќе го игра вечното дерби против битолски Пелистер во Скопје.