Измените на Уредбата за начинот на пресметка на данокот на моторни возила добија зелено светло од Владата. Со овие измени поголемо оданочување ќе има како за најстарите, така и за налуксузните нови автомобили. Според обраложението на Владата,ова се прави за да се намали емисијата на штетни гасови, заштита на животната средина и поради исполнување на обврските од потпишаниот Климатски договор од Париз, а и за усогласување со најновите ЕУ стандардите.

„Со примена на пропишаните коефициенти за пресметка на специфичната компонента за CO2 на данокот на моторни возила се овозможува зајакнато оданочување со данокот на моторни возила на најголемите загадувачи, а кои спаѓаат во категоријата на луксузни патнички возила или многу стари возила кои се најмалку еколошки од аспект на загадување на животната средина. Целта е поттикнување на граѓаните и компаниите да инвестираат во набавка на возила кои исполнуваат повисоки еколошки стандарди, без оглед дали станува збор за набавка на нови или половни возила, и со тоа придонес кон декарбонизација на транспортот во земјата и намалување на загадувањето на воздухот“, соопштија од Владата.

Оттаму објаснија дека новата метода, која се заснова на мерење емисијата на издувни СО2 гасови во реална околина, претставува глобално усогласена постапка за испитување на нивото на емисија на јаглерод диоксид од моторните возила, која е во задолжителна примена во ЕУ за сите новопроизведени возила од 2022 година, а истата овозможува подиректно поврзување на данокот на моторни возила со негативните екстерналии предизвикани од емисијата на CО 2 од возилата.