Поранешниот советник во Советот на Град Скопје, Петар Шапе, на „Фејсбук“ пишува дека ќе поднесе предлог-граѓанска иницијатива за Младинскиот културен центар (МКЦ) да го носи името на прерано починатиот музичар Андреј Ѓорѓиески од групата „ДНК“, кој трагично загина во пожарот во дискотеката „Пулс“ во Кочани.

„Длабоко фокусирани на меѓусебните партиски, политички и општествени препукувања за тоа која и чија е страната на која најмногу натежнува вината за трагедијата во Кочани, пренебрегнавме еден суштински, пред сè човечки аспект. Зад сите 59 имиња и презимиња стојат наши најблиски, роднини,пријатели, соседи, сограѓани кои на многу начини (оставија белег на нашите животи со што засекогаш ја задолжија целата заедница). Во ова сивило на политичко партиски препукувања за тоа кој бил виновен, а кој не, кога раните на жртвите се сè уште свежи, во општествената трка за тоа кој бил во право, а кој не, забораваме на најважната работа, а тоа е што ние ќе направиме за починатите и како можеме да им се оддолжиме (Ако воопшто е можно) бидејќи кабаетот е кај нас(како општество) и должни сме кон сите нив“, пишува Шапе во објавата.

„Како поранешен советник во советот на градот Скопје, во периодот што следи ќе поднесам предлог граѓанска иницијатива, “Младинскиот културен центар-МКЦ” Скопје, да го носи името на прерано починатата музичка ѕвезда Андреј Ѓорѓиески-ДНК, уметник, хуманист, а пред сè Човек, кој својот живот го жртвуваше за да спаси други млади луѓе“, вели тој.

Во повеќе од 20 годишната музичка кариера, на Македонија и даде голем број на хитови со кои растеа и ќе растат многу генерации.

Во дискотеката „Пулс“, за време на настап на „ДНК“, на 16 март изби катастрофален пожар во кој загинаа 59 млади луѓе, а околу 200 беа ранети. Меѓу загинатите, освен Ѓорѓиески, беа уште петмина членови и соработници на „ДНК“: гитаристот Александар Коларов, тапанарот Ѓорги Ѓоргиев, пратечкиот вокал Сара Пројковска, клавијатуристот Филип Стевановски, инаку директор на Центарот за култура во Штип и Мартин Атанасовски, кој настапуваше со бендот како битбоксер.