Избеганиот поранешен каталонски лидер Карлес Пуџдемон се предаде на белгиските власти, откако Шпанија издаде нов налог за негово апсење, по изрекувањето на пресудите за неговите колеги кои како него работеа во насока за независност на Каталонија, објавија медиумите.

Пуџдемон, во придружба на неговите адвокати, доброволно се појави пред белгиските власти, стои во соопштението на неговата канцеларија. Како што се додава, Пуџдемон го отфрлил налогот за апсење и се противи на било каков обид да биде вратен во Шпанија.

Меѓутоа, шпанскиот Врховен суд соопшти дека истражен судија им пренел на белгиските власти дека Пуџдемон нема парламентарен имунитет, кој би можел да ја спречи неговата екстрадиција во Шпанија.

Во соопштението на судот се наведува дека белгиските власти утринава барале појаснување за неговиот случај.

Агенцијата „АП“ забележа дека не е јасно дали Пуџдемон и понатаму се испитува или е задржан во притвор.

Тој, заедно со неколку соработници од Каталонија, побегна во Белгија во октомври 2017 година, откако беа повикани во суд поради обидот за отцепување и одржување на референдум за независност на Каталонија.

Врховниот суд во Мадрид во понеделникот осуди девет поранешни каталонски политичари и активисти на затворски казни од девет до 13 години, поради нивните улоги во неуспешниот референдум за прогласување на независност на Каталонија во 2017 година.

Останатите троцја се прогласени за виновни само за граѓанска непослушност и не добиле затворски казни.