Се полни списокот за венчавки во Порта Македонија – младоженците добија достоинствена локација
Доколку сакаат да се венчаат во оваа сала, идните младоженци нема да платат ниту денар повеќе од сумата за која би склучиле брак во некоја од службените простории на Управата за водење матични книги, објаснува за „Слободен печат“ директорот Фатон Фазлиу
Веќе е пријавена една двојка за склучување граѓански брак во салата на објектот Порта Македонија во Скопје, познат и како Триумфална порта, а списокот за јули станува сè поголем. Доколку сакаат да се венчаат во оваа сала, идните младоженци нема да платат ниту денар повеќе од сумата за која би склучиле брак во некоја од службените простории на Управата за водење матични книги, објаснува за „Слободен печат“, директорот Фатон Фазлиу.
Препорачано
Според него, со повторното активирање на оваа локација, Управата само сака да им понуди соодветно уредена и пристојна сала за венчавки. Откако објектот не беше во функција неколку години, Управата склучи меѓуинституционален договор со Националната установа (НУ) Музеј на македонската борба за самостојност – Скопје, според кој, Управата ќе има право да ја користи просторијата секој четврток, петок, сабота и недела, во термин од 14 до 17 часот, за изведување службени венчавки. Соработката стапува во сила од 1 јуни и ќе трае до 31 декември годинава, со можност за продолжување по заемна согласност на страните, вели Фазлиу.
– Веќе има интерес од идните сопружници, но повеќе очекуваме за јули и август, бидејќи јунските регистрации се веќе одамна закажани. Салата е реновирана и средена, а граѓаните може да го користат и блискиот паркинг во ГТЦ. Се надевам дека со ставањето во функција на оваа локација ќе се намали бројот на венчавки по кафеаните, а со тоа ќе им се намали и трошокот на граѓаните – вели Фазлиу.
Досега идните младоженци имаа две опции – да склучат брак во некоја од службените простории на Управата за водење на матичните книги или да повикаат матичар во ресторанот каде што ја одржуваат свадбената веселба. Сепак, стерилноста и тесниот простор на матичните канцеларии ги одбиваат идните сопружници, иако тоа ги чини само 150 денари (100 денари – административна такса и 50 денари за образецот на изводот од матичната книга на венчаните).
Во последниве години сè повеќе бракови се склучуваат во специјализираните ресторани, што значи и зголемено излегување на матичарите на терен за време на викендите и државните празници.
Без разлика дали сакате да се венчате во хотел, во шума, во градината на вашата куќа или на плажа, таа ексцентричност чини пари. Според директорот Фазлиу, цените на граѓанските регистрации не се променети од февруари минатата година. Прецизната математика на Правилникот на УВМК, покажува дека во работни денови, ако местото на венчавката е оддалечено до 10 километри, тоа задоволство чини 4.765 денари. Во работни денови по работно време, односно по 16.30 часот цената на матичарот е 5.242 денари. За време на викенди и државни празници сега се наплатуваат 10.484 денари. Овие цени важат ако венчавката е до 10 километри оддалеченост од службените простории на УВМК. Ако венчавката е подалеку од 10 километри, надоместокот се зголемува за 100 отсто. Венчавањето во ресторан не е задолжително и е по желба на младите и претставува еден вид луксуз, додава директорот Фазлиу.
Идните младоженци бираат атрактивни локации
Како поегзотични места што идните брачни двојки ги избирале за да го кажат своето „да“, биле Порта Македонија, Плоштадот во Скопје, Градскиот парк, Скопското кале, на брод среде Охридското Езеро, на Милениумскиот крст на Водно, во Ботаничката градина во Скопје, во Музејот на националната борба на македонскиот народ, позначајните манастири и цркви низ Македонија, како и во зимските туристички центри. Упатените велат дека во изминатава деценија освен граѓански, сè повеќе млади се решаваат и за црковен брак, кој е дополнителна ставка во свадбениот биланс.
Доколку, не дај боже, се премислат или се спречени поради друга „виша сила“, идните сопружници треба да знаат дека нема да им бидат вратени парите уплатени за венчавка на терен.
Просечната цена на една свадба во моментов се движи меѓу 7 и 15.000 евра, а просечниот број гости е од 150 до 300 гости.
Најмногу се венчаваат во август, најмалку во април
Лани во Македонија биле склучени 11.066 брака, покажуваат последните статистички податоци и во споредба со претходната година, нивниот број е намален за 12,7 отсто. Август е најомилениот месец за венчавки – 1.452 или 13,1 отсто од вкупната бројка, а најмалку склучени бракови се забележани во април – 661 или 6 отсто. Инаку, просечната возраст при склучување прв брак е 27,6 години за невестата и 30,1 години за младоженецот. Бројот на разводите е зголемен за 14,7 % во споредба со 2023 година.
Најчесто е стапувањето во прв брак со учество од 92,9 отсто за жените и 92,3 отсто за мажите.
Податоците откриваат и уште еден интересен податок, а тоа е дека во втор брак со учество од 7,1 отсто и трет брак со учество 0,7 отсто, во вкупниот број склучени бракови, почесто стапуваат мажите.
Во 2024 година, најголем број бракови 3.658 или 33,1 отсто кај жените и 3.871 брак или 35 отсто кај мажите се случиле во старосната група од 25 до 29 години.
Според возраста, најголем број разводи кај жените имало во старосната група од 35 до 39 години, односно 359 или 17,7 %, а кај мажите во старосната група од 40 до 44 години, односно 347 или 17,1 отсто. Според траењето на бракот, најмногу разводи, 488 или 24,1 отсто, се случиле од 5 до 9 години по склучувањето на бракот.
