Лидерот на СДСМ Венко Филипче до последен момент (утре, до 24 часот) кога истекува рокот за кандидатските листи за локалните избори, ќе калкулира дали во Кичево и во Струга ќе истрча со свои кандидати за градоначалници. Од евентуалниот пазар за заемна поддршка во некои општини со партиите на Албанците ќе зависи дали во Кичево и во Струга ќе имаат кандидати. Двата града „висат“, бидејќи нема договор меѓу базата и раководството.

За Кичево, дилемата на СДСМ е дали да одат со свој кандидат или да го поддржат кандидатот на ВМРО-ДПМНЕ, лекарот Александар Јовановски, додека за Струга, битен им е „дил“ со партија од албанскиот блок – или ДУИ или Вреди, а за возврат да добијат поддршка на нивните кандидати во Куманово и во Крушево.

За Кочани, пак, Филипче и Мицкоски не се договорија да се обединат околу заеднички кандидат, по ужасната трагедија во дискотеката „Пулс“. Филипче, кој прв излезе со таков предлог и беше одбиен, за Кочани го номинира Игор Христов, претседателот на општинската организација на партијата. Мицкоски, пак, единствено за Кочани не номинира партиски кандидат, туку излезе со поддршка на натпартиски кандидат – лекарот Влатко Грозданов – и повика сите партии да ја поддржат неговата номинација.

Впечатливо е и дека СДСМ за градоначалник на Илинден го номинира поранешниот градоначалник на ВМРО-ДПМНЕ, Жика Стојановски. Стојановски претходно четири мандати беше градоначалник од ВМРО-ДПМНЕ, а на минатите избори беше независен кандидат.

ЗНАМ на Максим Димитриевски остана само со две номинации за градоначалници, и тоа во Куманово и во Центар, иако се надеваше на поддршка од ВМРО-ДПМНЕ во четири или пет општини. Во Куманово, Димитриевски повторно ќе бара доверба од граѓаните, додека во Центар, ЗНАМ го кандидира заменик-министерот за енергетика Мирослав Лабудовиќ.

Карактеристика на претстојните локални избори е дека владините партнери ВМРО-ДПМНЕ, Вреди и ЗНАМ во некои општини ќе се поддржат уште во првиот изборен круг. Исто така, интересно е дека ВМРО-ДПМНЕ и СДСМ во некои општини со мнозинство албански гласачи нема да номинираат свои кандидати. Во општините, пак, со мешан етнички состав, како Кичево и Брвеница, ВМРО-ДПМНЕ ќе има кандидати, а исклучок е Струга, каде што уште во првиот круг ќе го поддржат независниот кандидат поддржан од Вреди Менди Ќира. Наспроти ова, Вреди ќе номинира кандидат за градоначалник на Скопје, а поддршка за Орце Ѓорѓиевски ќе испорача во вториот изборен круг.