Во контекст на веројатното домаќинство на Светското првенство во фудбал за 10 години, Саудиска Арабија претходно најави дека планира да изгради стадион со капацитет од 92.000 гледачи во Ријад кој ќе може да биде домаќин на големи меѓународни настани.

Саудиска Арабија официјално ја поднесе својата кандидатура да го организира Мундијалот 2034, објави „Гулф Онлајн“, додавајќи дека се очекува кралството да го добие турнирот поради отсуството на конкурентни понуди.

Објавата уследи по одобрувањето на саудискиот принц Мохамед Бин Салман, откако беа исполнети сите детали и барања од понудата, според официјалната саудиска агенција за печат.

Понудата до ФИФА во Париз ја достави официјална делегација предводена од министерот за спорт принцот Абдулазиз Бин Турки Бин Фајсал и претседателот на Фудбалската федерација на Саудиска Арабија Јасер Ал-Мишехал.

– Ние сме посветени да бидеме домаќини на исклучително издание на Светскиот куп на ФИФА во кој ќе учествуваат 48 тимови во една земја за прв пат во историјата на натпреварувањето… и ќе помогне да се негува генерација спортисти способни да се натпреваруваат на највисоката светска сцена. Ќе продолжиме да му ја покажуваме на светот трансформацијата на нашата нација во сите сектори – рече Бин Фајсал.

Официјалното прогласување на победничката понуда се очекува за време на состанокот на Генералното собрание на ФИФА во декември.