Лидерите на САД, Мексико и на Канада се очекува да ги остават настрана трговските тензии и да бараат подлабока економска интеграција на самитот што ќе започне денеска во Мексико Сити, каде што ќе разговараат и за безбедноста и миграцијата.

Мексиканскиот претседател, Андрес Мануел Лопез Обрадор, ќе биде домаќин на неговиот американски колега Џо Бајден и на канадскиот премиер Џастин Трудо, на самитот неформално познат како „Тројцата амигоси”, јавуваат американските телевизии.

Додека напорите за решавање на проблемот со миграцијата и трговијата со дрога доминираа вчера на билатералната средба Лопез Обрадор – Бајден, се очекува со доаѓањето на Трудо фокусот на разговорите да биде насочен кон економски прашања.

Зајакнувањето на регионалните економски врски „им овозможува на САД да бидат производствена сила за која зборуваше претседателот Бајден, но тоа е и победа за Мексико и Канада”, изјави пред медиумите советникот за национална безбедност на Белата куќа, Џејк Саливан. Тоа „ја намалува нашата зависност од други земји и други делови од светот кои не мора да ги делат истите вредности што ги споделуваме со нашите партнери овде во Северна Америка”, додаде тој.

Мексико се надева дека ќе има корист од активностите што ги спроведува Вашингтон за намалување на зависноста од азиските производители.

Минатата година САД го повикаа Мексико да се вклучи кон проект вреден повеќе милијарди долари за зајакнување на производството на полупроводници, со цел САД да бидат компетативни на Кина во тој сегмент.

Бајден во 2021 година ги оживеа разговорите „Тројцата амигоси”, настојувајќи да ја зајакне соработката откако неговиот претходник Доналд Трамп го одложи регионалниот самит.

Но, и односите меѓу Лопез Обрадор и Бајден не се најдобри.

САД и Канада поднесоа формална жалба против Мексико за непочитување на Северноамериканскиот трговски договор. Вашингтон и Отава сметаат дека политиката на мексиканскиот претседател за зајакнување на улогата на државата во енергетскиот сектор им штети на странските инвеститори и го попречува развојот на чиста енергија.

Иако Бајден и Трудо може приватно да изразат загриженост на Лопез Обрадор во врска со енергетските реформи, во јавноста тие веројатно ќе го нагласат потенцијалот за поблиска соработка, оценуваат во анализи американски медиуми.

Исто така вчера се појавија и разлики во ставовите на САД и Мексико во нивниот пристап за справување со зголемениот број мигранти на заедничката граница.

„Време е да се стави крај на ова заборавање, ова напуштање, овој презир кон Јужна Америка и Карибите”, рече на почетокот на билатералните разговори Лопез Обрадор, кој сака да ги зголеми американските инвестиции во регионот.

Бајден ги бранеше активностите на САД по односното прашање посочувајќи дека во изминатите 15 години се инвестирани „десетици милијарди долари”.