Алатките за вештачка интелигенција можеби претставуваат закана за писателите на трилер и научна фантастика, но немаат доволно оригиналност и се целосно лишени од секаква смисла за хумор за да бидат пречка за сериозните романсиери, напиша британскиот писател Салман Ружди во едно француско книжевно списание.

Во една статија преведена на француски за литературното списание НРФ, Ружди рече дека го тестирал Четџипити барајќи од него да напише 200 зборови во негов стил.

Тој го опишува резултатот како „куп глупости“.

„Ниту еден читател кој прочитал една од моите страници не може да помисли дека јас сум авторот. Така да, мирен сум“, рече тој.

„Проблемот е што овие суштества учат многу брзо“, вели авторот на „Сатански стихови“ и „Деца на полноќ“ и добитник на престижната Букерова награда, додавајќи дека вештачката интелигенција сè уште може да ги загрози писателите на жанровската литература, како што се трилерите и научна фантастика, каде што оригиналноста е помалку важна.

Тој смета дека особено ранливи би можеле да бидат писателите на филмски и ТВ сценарија.

„Со оглед на тоа што во Холивуд постојано се прават нови верзии на исти филмови, вештачката интелигенција би можела да се користи за пишување сценарија“, рече тој.